საფრანგეთსა და საბერძნეთში ჩატარებული სპეცოპერაცია Caucase Normandie-ის ფარგლებში დაკავებულთა შორის ე.წ. კანონიერი ქურდი ლაშა შუშანაშვილია.
როგორც შინაგან საქმეთა სამინისტროში გამართულ ბრიფინგზე გახდა ცნობილი, დაკავებულია ოთხი ქართველი ე.წ. „კანონიერი ქურდი“. კერძოდ, საბერძნეთის ქალაქ სალონიკში დააკავეს ლაშა შუშანაშვილი, მეტსახელად „ლაშა რუსთავსკი“, ხოლო ათენში – ნოდარ შუკაკიძე, მეტსახელად „ნოდო გლდანსკი“ და მერაბ ასანიძე, მეტსახელად „ჩიკორა“. გარდა ამისა, საფრანგეთის ქალაქ მონტობანში დააკავეს ე.წ. კანონიერი ქურდი ალექსანდრე კობალაძე, იგივე რამაზ ღუღუნიშვილი, მეტსახელად „სიუ“.
„ქართველი, ფრანგი და ბერძენი სამართალდამცველების ორწლიანი, აქტიური საპოლიციო თანამშრომლობის შედეგად, ქართველი კანონიერი ქურდების გარდა, საფრანგეთსა და საბერძნეთში ერთდროულად ჩატარებული სპეცოპერაციის დროს, სხვადასხვა სიმძიმის ასობით ქურდობის ფაქტზე, ქართული კრიმინალური დაჯგუფების სხვა წევრებიც დააკავეს. საფრანგეთში სულ დაკავებულია ტრანსნაციონალური ორგანიზებული კრიმინალური დაჯგუფების 15 წევრი, მათ შორის საქართველოს 14 და სომხეთის 1 მოქალაქე; საბერძნეთში კი – საქართველოს 23 მოქალაქე, რომლებიც ქურდავდნენ ბინებსა და მაღაზიებს, ასევე, ახდენდნენ მოპარული ნივთების შენახვა-რეალიზაციასა და ფულის გათეთრებას“, – აცხადებენ შსს-ში.