საქართველოს პარლამენტთან თანამშრომლობით, 23-25 აპრილს, საქართველო საერთაშორისო საპარლამენტო ფორუმს მასპინძლობს. ბათუმში ნატო-ს საპარლამენტო ასამბლეის როუზ-როსის რიგით 97-ე სემინარი გაიხსნა.
სემინარის მონაწილეებს მისასალმებელი სიტყვით ნატო-ს საპარლამენტო ასამბლეაში პარლამენტის მუდმივმოქმედი დელეგაციის ხელმძღვანელმა, ირაკლი სესიაშვილმა მიმართა.
„ჩვენ დღეს აქ შევიკრიბეთ იმისათვის, რომ ვისაუბროთ მშვიდობაზე, უსაფრთხოებაზე, დემოკრატიაზე. იმისათვის, რომ ჩვენი რეგიონი და მსოფლიო იყოს მშვიდობიანი და კიდევ უკეთესი ჩვენი მოქალაქეებისთვის და ნებისმიერი ადამიანისთვის. ერთი წელი გავიდა რაც საქართველოს ნატოს საპარლამენტო ასამბლეას უმასპინძლა თბილისში და ერთი წლის თავზე ჩვენ ისევ ვხვდებით საქართველოში, რაც ჩვენთვის დიდი პატივია“,– აღნიშნა პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა.
მან საქართველოს დამოუკიდებლობისკენ სვლის ისტორიაზე ისაუბრა და ამ მიმართულებით ბათუმის, როგორც დამოუკიდებელი საქართველოს ერთგვარ სიმბოლოზე გაამახვილა ყურადღება. ირაკლი სესიაშვილმა საქართველოში და რეგიონში არსებულ გამოწვევებზე ისაუბრა.
„საქართველო წელს, 26 მაისს იზეიმებს ჩვენი ქვეყნის დამოუკიდებლობის გამოცხადების 100 წლის იუბილეს, ეს ჩვენთვის ღირსშესანიშნავი და მნიშვნელოვანი თარიღია. თითქმის ასი წელი გავიდა და ჩვენ სამწუხაროდ, კვლავ გვიწევს საუბარი ოკუპაციაზე. რუსეთის მიერ ოკუპირებულია საქართველოს ტერიტორიები, აფხაზეთი და ცხინვალი, ანექსია მოხდა ყირიმის, გრძელდება ოკუპაცია აღმოსავლეთ უკრაინის, სხვა ქვეყნებშიც არის დაძაბული ვითარება, რომელიც გამოწვეულია ჩვენი ჩრდილოელი მეზობლის პოლიტიკის გამო და ეს ყველა ჩვენთაგანისთვის მიუღებელია”,- განაცხადა ირაკლი სესიაშვილმა.