საპარლამენტო უმრავლესობის წევრმა გედევან ფოფხაძემ ჟურნალისტებთან საუბარში განაცხადა, რომ მისთვის პრინციპული მნიშვნელობა არ აქვს, პირადად დარჩება თუ არა პოლიტსაბჭოს შემადგენლობაში.
„მნიშვნელოვანია, პოლიტსაბჭოში წარმოდგენილი იყოს იმ ღირებულებების და შეხედულებების ადამიანები, რომლებიც ჩვენი პოზიციის გამტარებლები იქნებიან. როგორი განწყობა და ტკივილი არის საზოგადოებასა და ქუჩაში, იმის მიმტანი უნდა იყოს პოლიტსაბჭოში. თუკი პოლიტსაბჭო კონიუნქტურაზე მორგებული პოლიტიკოსებით დაკომპლექტება, ეს პარტიასაც დააზარალებს და პოლიტსაბჭოსაც. დღეს პოლიტსაბჭოს მთავარი პრობლემა არის ის, რომ არ არის ფუნქციონირებადი. მთავარი დამოკიდებულება არის ის, რომ ჩემი პოზიცია და გულისტკივილი ვინმემ პოლიტსაბჭოში მიიტანოს. პიროვნულად ვიქნები თუ არა პოლიტსაბჭოს შემადგენლობაში, ამას მნიშვნელობა არ აქვს“, – განაცხადა გედევან ფოფხაძემ.
აქვე ფოფხაძემ დაადასტურა, რომ ამ ეტაპზე მისი მხრიდან უმრავლესობისა და „ქართული ოცნების“ შემადგენლობიდან გასვლის საკითხი დღის წესრიგიდან მოხსნილია.