შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა NATO-საქართველოს სახალხო დიპლომატიის ფორუმზე სიტყვით გამოსვლისას ისაუბრა რუსეთიდან მომავალ საფრთხეებზე და პროპაგანდაზე, რომელსაც რუსეთი ახორციელებს.
„ჩვენი სამინისტრო მუშაობს ოკუპაციის თემაზე, ჩვენ ყოველდღიური პროვოკაციები გვაქვს, განსაკუთრებით 2008 წლის შემდეგ, ადგილობრივების გატაცება ხდება საკუთარი ბაღებიდან. რეგულარულად ხდება ადამიანის უფლებების დარღვევა, მათი სიცოცხლე არ არის დაცული. 22 აპრილი ტრაგიკული დღე იყო ჩვენთვის, როცა არჩილ ტატუნაშვილი გაიტაცეს, სიკვდილამდე სცემეს, მოკლეს და 26 დღე არ იყო გადმოცემული. ძალიან რთულია რუსეთის წინააღმდეგ პროპაგანდის წარმოება. რუსულ მედიაში იყო სიუჟეტი, თითქოს ოსები გამოხატავდნენ პროტესტს და აცხადებდნენ, რომ ცხედარი არ გადაცემულიყო ქართველებისთვის. ინფორმაცია აიტაცეს და ბევრი დაძაბულობა შექმნა ამან. ეს არ იყო რეალური ამბავი. ჩვენ გავაანალიზეთ ვიდეო და აღმოჩნდა, რომ ოსებს მსგავსი რამ არ მოუთხოვიათ. მათ შექმნეს უხილავი ბარიერები, სტერეოტიპების და მტრის ხატის მიმართ. ძალიან რთული დასაძლევია რუსული პოლიტიკა. ასევე, საქართველოში არსებობს სამოქალაქო საზოგადოება, პოლიტიკური პარტიები, რომლებიც რუსეთს უჭერენ მხარს, მაგრამ ისინი წარუმატებლები არიან“, – განაცხადა ქეთევან ციხელაშვილმა.