საქართველოს პრეზიდენტმა პარლამენტში ყოველწლიური მოხსენებით გამოსვლა დაასრულა. 20 წუთის განმავლობაში მან რამდენიმე საკითხზე გაამახვილა ყურადღება, მათ შორის ეკონომიკურ განვითარებასა და ბიზნესის მდგომარეობაზე.
პრეზიდენტის შეფასებით, ბიზნესზე წნეხი აღარ არის და დღეს ის თავისუფალია. მისი განცხადებით, ის მიესალმება საგადასახადო მიმართლებით პრემიერის ინიციატივებს.
“მივესალმები პრემიერის ინიციატივებს საგადასახადო მიმართულებით. მივესალმები სტარტაპებისა და ინოვაციების ხელშეწყობას, თუმცა 2020-ის მიზანი სოციალური თანასწორობის მიმართულებით, სამწუხაროდ, ვერ იქნა მიღწეული”, – განაცხადა პრეზიდენტმა და დასძინა, რომ ის პროცესები, რომლებიც საბანკო სესხებთან მიმართებაში მიმდინარეობდა, მოსახლეობისთვის სერიოზული დარტყმა იყო. პრეზიდენტმა ეროვნული ბანკის პრეზიდენტს მადლობა გადაუხადა იმ ქმედებებისთვის, რასაც უწყება ეკონომიკური სტაბილურობისთვის დგამს.
პრეზიდენტმა თავისუფალ ვაჭრობასთან დაკავშირებითაც გაამახვილა გამოსვლაში ყურადღება:
“მიმდინარეობს ეფექტური თანამშრომლობა შეერთებულ შტატებთან, მათ შორის თავდაცვის სფეროში და არის ძალიან საინტერესო სტრატეგიული თანამშრომლობის ქარტია.
იწყება მოლაპარაკებები და შეიძლება სერიოზულად გაღრმავდეს მოლაპარაკებები თვისუფალი ვაჭრობის მიმართულებით. ამ თვალსაზრისით, მინდა აღვნიშნო, რომ ინვესტორების და მათი ინეტერსების დაცვა საქართველოში ძალიან მნიშვნელოვანია იმისთვის, რომ ეს მოლაპარაკებებიც წარმატებულად გაგრძელდეს და მეტი ინვესტორი შემოვიდეს ჩვენს ქვეყანაში.
საერთოდ თავისუფალ ვაჭრობას თუ შევხედავთ, ჩვენ აქ შთამბეჭდავი შედეგი გვაქვს, იმიტომ რომ რეალურად ვიწყებდი მაშინ, როგორც ქვეყანა, რომელსაც დაახლოებით 200-მილიონიან ბაზართან ჰქონდა თავისუფალი ვაჭრობა და დღეს საქართველოს 2-მილიარდიან ბაზარზე შეუძლია თავისუფალი ვაჭრობით გაიტანოს თავის პროდუქცია და ეს პოზიტიურია, და ეს წინაპირობაა ეკონომიკური ვითარების გაჯანსაღების და გამოსწორების, იმიტომ, რომ იმ სტრატეგიულ ფუნქციასთან ერთად, რომელიც საქართველოს განსაზღვრული ჰქონდა, როგორც ტრანზიტულ ქვეყანას, თავისუფალი ვაჭრობა კიდევ უფრო ზრდის და აუმჯობესებს ინვესტიციების მოზიდვის და ეკონომიკის გაძლიერების პერსპექტივებს.”, – განაცხადა პრეზიდენტმა მარგველაშვილმა.
პრეზიდენტ გიორგი მარგველაშვილის გამოსვლას პარლამენტში პრემიერი გიორგი კვირიკაშვილი და მთავრობის წევრებიც ესწრებიან.