ნათია მეზვრიშვილი – ის ადამიანები, რომლებიც დღეს ჩვენ დავაკავეთ, ოჯახის წევრები მათ გადამალვას ცდილობდნენ

შინაგან საქმეთა მინისტრის მოადგილემ ტელეკომპანია „TV პირველის“ ეთერში, ხორავას ქუჩაზე მომხდარი მკვლელობის საქმეზე ისაუბრა და აღნიშნა, რომ აღნიშნული საქმის მოწმეები გამოძიებასთან არ თანამშრომლობდნენ.
„როდესაც მკვლელობის ეს საზარელი შემთხვევა მოხდა და ჩვენ გამოძიება დავიწყეთ, არც ერთი მოწმე, ჩვენ ეს არაერთხელ ვთქვით და კიდევ მინდა გავიმეორო, იმიტომ, რომ ამას ძალიან დიდი მნიშვნელობა აქვს – ამ ადამიანებმა, რომლებსაც ვეხვეწებოდით, რომ უბრალოდ ეთანამშრომლათ და ინფორმაცია მოეწოდებინათ, გამოძიების ეტაპზე, არა თუ არ გვაწვდიდნენ, არამედ ზოგიერთი მათგანი ურთიერთსაწინააღმდეგო ინფორმაციას გვაძლევდა. ზოგიერთმა მათგანმა, სხვათაშორის, საკვანძო მოწმეებმა, სასამართლოში ჩვენება უკვე შეცვალეს, რის გამოც, სამწუხაროდ, მივიღეთ ის შედეგი, რაც მივიღეთ სასამართლოში.
მე არ ვსაუბრობ არც იმაზე, რომ ახლა, 21-ე საუკუნეში ჩვენ მხოლოდ მოწმეების ჩვენებებზე ვართ დამყარებული, თუმცა, ასეთი კატეგორიის საქმეებში მოწმეების ჩვენებებს ძალიან დიდი მნიშვნელობა აქვს. როგორი რეალობა გვქონდა ჩვენ: არა მხოლოდ მოზარდები არ თანამშრომლობდნენ, არამედ მათი ნათესავები, სრულწლოვნები, ზრდასრული ადამიანები, მათი ოჯახის წევრები არ აწვდიდნენ გამოძიებას ინფორმაციას. უფრო მეტიც, დღესავით მახსოვს, რომ ის ადამიანები, რომლებიც დღეს ჩვენ დავაკავეთ, იმ მოზარდების, რომლებსაც პროკურატურამ შემდგომ ბრალი დასდო, მათი ოჯახის წევრები მათ გადამალვას ცდილობდნენ. უფრო მეტიც, ზოგიერთი მათგანი წუთი-წუთზე საზღვარზე გადაყვანისთვის ემზადებოდა და რომ არა სამართალდამცავი ორგანოების ძალისხმევა, ეს ადამიანები დღეს ბრალდებულის სკამზე ვერ ისხდებოდნენ, ამ ადამიანების მიმართ გამამტყუნებელი განაჩენი ვერ იქნებოდა გამოტანილი და ეს ძალიან მნიშვნელოვანია“ – განაცხადა ნათია მეზვრიშვილმა.