ჩვენი ოპონენტები ცდილობენ, სპექტაკლის დადგმით წარმოაჩინონ თავიანთი ქცევა, – ამის შესახებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა პარლამენტის სხდომაზე გამოსვლისას განაცხადა.
მისი თქმით, დეპუტატი ნიკა მელია ჟესტიკულაციით ცდილობს გარკვეული შთაბეჭდილებების შექმნას, რაც არ ასახავს კულტურას, რომელსაც საზოგადოება მოითხოვს.
„ის, რომ მელია გამოდის და ხელების ჟესტიკულაციით ცდილობს, „კაი ბიჭის“ და მობლატავეს შთაბეჭდილება შექმნას, ეს ნამდვილად ვერ ასახავს იმ სიმართლეს და კულტურას, რასაც ჩვენგან საზოგადოება ითხოვს.
დიახ, მე მასთან ვერ ვითანამშრომლებ. მეტსაც გეტყვით, მისგან არც ბოდიშს მივიღებ, პირიქით, აქეთ ვთხოვ, არ მოიხადოს ბოდიში, არც მან და არც მისმა კოლეგებმა. არ მოიხადოთ ბოდიში, რადგან ბოდიში აბსოლუტურად სხვა განზომილება, სხვა კულტურაა. ბოდიში და მადლობა არის ლოცვა და თქვენი კულტურა ძალიან შორსაა ასეთი მოქმედებებისგან“, – განაცხადა სხდომაზე ირაკლი სესიაშვილმა.
გუშინ ფრაქცია „ნაციონალური მოძრაობის” სხდომაზე ნიკა მელიამ შინაგან საქმეთა მინისტრობის კანდიდატს რუსთაველის გამზირზე მისი დაკავების ფოტომასალა წარუდგინა და აღნიშნა, რომ მას უხეშად ექცეოდნენ და არც ერთმა პოლიციელმა ამის გამო პასუხი არ აგო. როგორც გიორგი გახარიამ ამის პასუხად განაცხადა, მელია უხეშად არღვევდა წესრიგს და პოლიციელებს შეურაცხყოფას აყენებდა.
„თქვენ დღეს აქ ხართ და არ ხართ დაკავებული. თქვენ სპეკულირებთ იმ იმუნიტეტით, რომელიც გაქვთ და კიდევ ერთხელ გეუბნებით, მსგავსი შემთხვევის გამეორების პირობებში იგივე შედეგი იქნება, გარწმუნებთ”, – განაცხადა შს მინისტრობის კანდიდატმა.