სერგი კაპანაძე – საქმეში მეტი დამატებითი კითხვა გაჩნდა

„ევროპული საქართველოს” წევრის, საგამოძიებო კომისიის თავმჯდომარის, სერგი კაპანაძის განცხადებით, ხორავას ქუჩაზე მომხდარი მკვლელობის საქმეში კიდევ უფრო მეტი კითხვის ნიშანი გაჩნდა.
განცხადება მან მედიასთან კომისიის მუშაობასთან დაკავშირებით გააკეთა.
„სამწუხაროდ, ძალიან ბევრი კითხვა, რომელიც ჩვენ დავსვით რჩება პასუხგაუცემელი. კიდევ უფრო სამწუხარო ის არის, რომ საქმეში მეტი დამატებითი კითხვა გაჩნდა. ჩვენ გავაგრძელებთ საჯარო შეხვედრებს და ეს იქნება გაცილებით ვიწრო ფორმატში. ასევე შეხვედრები გვექნება სრულწლოვან თვითმხილველებთანაც. კომისიის სრულ ფორმატში შეხვედრა შაბათს არასამთავრობო ორგანიზაციებთან და სახალხო დამცველთან გაიმართება. ამის შემდეგ კომისიის წევრები დეტექტივების კონკრეტული ჯგუფის უფროსს გამოვკითხავთ“, – განაცხადა სერგი კაპანაძემ.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.