“ჩვენ გუშინ ამ ფაქტის ოთხი უშუალო შემსწრე გამოვკითხეთ“

ხორავას ქუჩაზე მკვლელობის საქმეზე შექმნილმა დროებითმა საგამოძიებო კომისიამ მკვლელობის უშუალო შემსწრე კიდე ოთხი პირი გამოკითხა.
ამის შესახებ ამავე კომისიის წევრმა და უმრავლესობის დეპუტატმა მამუკა მდინარაძემ ჟურნალისტებთან საუბრისას განაცხადა.
მისი თქმით, მიმდინარეობს იმ ჩვენებების შემოწმება, რა ჩვენებებიც მათ გამოძების პროცესში მისცეს.
„ჩვენ გუშინ ამ ფაქტის ოთხი უშუალო შემსწრე გამოვკითხეთ. დღეს კიდევ ერთი გამოიკითხება. ჩვეულებრივად შემოწმება მიდის იმ ჩვენების, რა ჩვენებებიც ამ ადამიანებმა წინასწარ გამოძიებას და შემდეგ სასამართლოს მისცეს. აქედან გამომდინარე, ჯერ დასკვნების გაკეთება ცოტა ნაადრევია. ჩვენ ეს მასალები ყურადღებით უნდა გამოვიკვლიოთ, მათ შორის მტკიცებულებები“,- განაცხადა მამუკა მდინარაძემ.
კითხვაზე თუ რამდენად ღირებულია მოწმეების მიერ მიწოდებული ინფორმაცია, მდინარაძე ჩვენებების შეფასებებისგან თავს იკავებს.
„დღეს ერთის გამოკითხვა მიმდინარეობს და შემდეგ ვნახოთ, საჭიროებიდან გამომდინარე ამ მოწმეების გამოკითხვით რა გამოიკვეთება. თუ რაიმე ახალი გარემოება გამოიკვეთა, ბუნებრივია ჩვენ იმ ადამიანებსაც გამოვკითხავთ, თუ გამოკითხულები სხვა მოწმეებზე მიუთითებენ. მაგრამ თუ არ გამოიკვეთა, სხვა მოწმეების გამოკითხვას გავაგრძელებთ“,– განაცხადა მდინარაძემ.
დეპუტატის თქმით, გუშინ მოწმეების გამოკითხვით ხელშესახები გარემოება არ გამოკვეთილა.
„რაიმე ისეთი ხელშესახები ახალი გარემოება გუშინ სამწუხაროდ არ გამოკვეთილა. ესენი იყვნენ ადამიანები, რომლებიც იმ დღეს უშუალოდ ჩხუბის ფაქტს შეესწრნენ და ამ ეზოს შიგნით სხვადასხვა რაკურსით უყურებდნენ”,- განაცხადა მამუკა მდინარაძემ.