საპარლამენტო ოპოზიციის კრიტიკის საპასუხოდ, პარლამენტის რიგგარეშე სხდომაზე ვიცე-სპიკერმა, გია ვოლსკიმ განაცხადა, რომ უმცირესობისთვის ბევრი საკითხია, რომელიც ბიძინა ივანიშვილთან ასოცირდება. მისივე თქმით, “ნაციონალური მოძრაობის” წევრებმა ერთ-ერთი ცნობილი საზოგადო მოღვაწე გამოიყვანეს, გარკვეულ საკითხებზე ბიძინა ივანიშვილის საწინააღმდეგოდ ალაპარაკეს და ამ ადამიანის ავტორიტეტი საზოგადოებაში დამარხეს.
“ბევრი საკითხია ისეთი, რომელიც ეხება ბიძინა ივანიშვილის ფაქტორს და ამ მიმართულებით სპეციალიზაცია ჩამოყალიბდა უმცირესობაში, ისევე, როგორც უმცირესობის ყოფილ უმცირესობაში, „ნაციონალურ მოძრაობაში“ და ამ თემასთან დაკავშირებით მუდმივი ლაპარაკი ერთ-ერთი სტრატეგიული პოლიტიკური მიმართულებაა, რომლიც ნებისმიერ თემას თან სდევს. “ნაციონალური მოძრაობის” პროპაგანდისტულმა ქვედანაყოფმა, ერთ-ერთი ცნობილი საზოგადო მოღვაწე, კულტურის დამსახურებული ადამიანი გამოიყვანეს, ალაპარაკეს გარკვეულ საკითხებზე ბიძინა ივანიშვილის საწინააღმდეგოდ, რეალურად დამარხეს ამ ადამიანის ავტორიტეტი საზოგადოებაში და ამავე დროს, სამიზნეზე მიიტანა მორიგი იერიში. მე გეუბნებით, რომ შემიძლია წარმოვადგინო დიდი სია იმ საკითხების, საქმეების, თუნდაც პიროვნულად, თუნდაც თავისი საზოგადოებრივი მოღვაწეობის პერიოდში, რა გააკეთა ქვეყნისათვის, საზოგადოებისათვის, ცალკეული პიროვნებებისათვის, ნებისმიერ რგოლში შეგვიძლია აღმოვაჩინოთ ბევრი სიკეთე. თქვენ წარმოადგინეთ გარკვეული სია იმ საქმეების, რომელიც უპირისპირდება ქვეყნის, ან რომელიმე პიროვნების ინტერესებს. დაწყებული გამწვანების თემიდან, ეკოლოგიური თემიდან, დამთავრებული იმ ინვესტიციებზე, რაც დღეს ხორციელდება. ასევე, რამდენი ადამიანის დასაქმების თემიდან დაწყებული, დამთავრებული იმ საკითხებზე, რასაც ეკონომიკური განვითარება ჰქვია”, – განაცხადა გია ვოლსკიმ.
ცნობისათვის, პარლამენტის რიგგარეშე სხდომაზე, მთავრობის სტრუქტურული რეორგანიზაციის საკანონმდებლო პაკეტის განხილვა მიმდინარეობს.