თემირლან მაჩალიკაშვილის მამა, მალხაზ მაჩალიკაშვილი საგანგაშოს ვერაფერს ხედავს იმაში, რომ მისი ვაჟი ფეისბუქის პირად გვერდზე “ისლამური სახელმწიფოს” პროპაგანდის შემცველ ვიდეომასალას და ISIS-ის მებრძოლების ფოტოებს აქტიურად ავრცელებდა.
როგორც მაჩალიკაშვილმა „კვირასთან“ საუბარში აღნიშნა, მსგავსი სახის ფოტოების ხილვა, პანკისის ხეობაში მცხოვრები არაერთი ადამიანის ფეისბუქგვერდზეა შესაძლებელი.
რაც შეეხება იმ ფაქტს, რომ სოციალურ ქსელში თემირლან მაჩალიკაშვილი „ისლამური სახელმწიფოს“ ერთ-ერთი ლიდერის, თარხან ბათირაშვილს გარდაცვალების გამო, წუხილს გამოთქვამს, მალხაზ მაჩალიკაშვილი აცხადებს, რომ ბათირაშვილის გარდაცვალება თავადაც განიცადა.
„ამოდით ხეობაში, აისისის მებრძოლების ფოტოები 1000 -დან 998 -ს აქვს, ის სურათები, მარტო ხეობაში კი არა, საქართველოში -აჭარა აიღეთ, ქვემო ქართლი აიღეთ… ეგ ჩემთვის არაფერს არ ნიშნავს…..მიმდინარეობს ომები, ბავშვებს ხოცავენ…..თარხან ბათირაშვილის გარდაცვალებას მეც განვიცდიდი, ჩემზე მეტად თქვენი სახელმწიფო და თქვენი მთავრობა განიცდიდა, თქვენი მთავრობა იძახდა – „ჩვენი ბატონ -პატრონი თარხან ბათირაშვილია, სანამ ის ცოცხალია, არანაირი საფრთხე არ გვემუქრებაო“, თქვენი სახელმწიფო იძახდა, ნაძირალა სუს-ი იძახდა, გაიგეთ?! ამას მე არ ვიძახდი…“, – განაცხადა მაჩალიკაშვილმა.
ცნობისთვის, „ტაბულას“ მიერ მიმდინარე წლის იანვარში გამოქვეყნებული ინფორმაციით, 2016-2017 წლებში, Temirlan Pankisskii-ს (თემირლან მაჩალიკაშვილს) არაერთი ვიდეო აქვს ატვირთული და გამოქვეყნებული, რომელშიც ის “ისლამური სახელმწიფოს” პროპაგანდას ეწევა. ერთ-ერთ ვიდეოში ის გლოვობს „ისლამური სახელმწიფოს“ ერთ-ერთ ლიდერს თარხან ბათირაშვილს. გარდა ამისა, ის ფოტოებს და ვიდეოებს დებდა ISIS-ის მებრძოლების შესახებ. Cover-ზე კი, ლოპოტას ხეობაში ლიკვიდირებული ასლან მარგოშვილის ფოტო უდევს.
“ისლამური სახელმწიფოს” ვიდეოს, რომელსაც Temirlan Pankisskii ავრცელებდა, აწერია, რომ ისინი ალაჰისთვის კლავენ და ალაჰისთვის კვდებიან.
მალხაზ მაჩალიკაშვილი საგანგაშოს ვერაფერს ხედავს იმაში, რომ მისი ვაჟი ISIS-ის მებრძოლების ფოტოებს და ვიდეოებს აზიარებდა
2018/07/06 13:16:59
კომენტარები
ნანახია: 1504 ჯერ