იაშვილის საავადმყოფოს სოლიდური სიმსივნეების მკურნალობა დაემატა

მ.იაშვილის სახელობის ბავშვთა ცენტრალური საავადმყოფოს ონკოჰემატოლოგიის დეპარტამენტს ახალი სერვისი დაემატა: ყველა ტიპის (თავის ტვინის, ძვლების, რბილი ქსოვილების, თირკმლის, ღვიძლის, სასქესო ორგანოების) სოლიდური სიმსივნეებით დაავადებულ პაციენტთა დიაგნოსტიკა და მართვა.
მათი ინფორმაციით, დეპარტამენტში შესაძლებელია:
1. „ონკოლოგიურ დაავადებათა სრული დიაგნოსტიკა, ბიოფსია და ბიოპტატის ჰისტოლოგიური შესწავლა. აუცილებლობის შემთხვევაში მასალა იგზავნება გერმანიაში, ქ. კილის რეფერალურ პათოლოგიის ინსტიტუტში. ეს უკანასკნელი კვლევა უფასოა, მას გერმანული მხარე აფინანსებს.
2. დაავადების სტადირება – მაღალი რეზოლუციის მ.რ.ტ და კომპიუტერული ტომოგრაფია, რომელიც მაღალი კვალიფიკაციის რადიოლოგების მიერ სრულდება. 
3. ქიმოთერაპია – უახლესი გერმანული და ამერიკული პროტოკოლებით, უფასოა პაციენტისთვის, მას ფარავს საყოველთაო ჯანდაცვის და სოლიდარობის ფონდი. ასევე, ქიმოთერაპიის გართულებების მართვა. 
4. მძიმე შემთხვევების მართვაში მონაწილეობენ გერმანელი კოლეგები ქ. ფრაიბურგის ბავშვთა ონკოლოგიური ცენტრიდან, თავის ტვინის სიმსივნეების მართვისთვის კი შექმნილია ტუმორ-ბორდი გერმანელი ნეიროქირურგის და ქართველი რადიოლოგის, სხივური თერაპევტის, ნევროლოგის და ონკოლოგის მონაწილეობით. 
5. სიმსივნის ქირურგიული მკურნალობა მოიცავს როგორც ქართულ, ისე უცხოურ კლინიკებს. ეს უკანასკნელი ასევე უფასოა პაციენტისთვის და ყველა ხარჯს სოლიდარობის ფონდი, დიმიტრი ცინცაძის ფონდი და ჯანდაცვის სამინისტრო ფარავს“, – ნათქვამია ინფორმაციაში.