რაზე მოილაპარაკეს ტრამპმა და პუტინმა

“ჰელსინკში გამართული სამიტი რუსეთისა და ამერიკის შეერთებული შტატების პრეზიდენტებს შორის დასრულდა. პირისპირ შეხვედრისა და გრაფიკით გათვალისწინებული გაფართოებული შემადგენლობით ჩატარებული მოლაპარაკებების შემდეგ, ტრამპმა და პუტინმა ჩაატარეს პრესკონფერენცია, სადაც ისაუბრეს შეხვედრის საბოლოო შედეგებზე”, – წერს გაზეთი “რეზონანსი” სტატიაში სათაურით, რაზე მოილაპარაკეს ტრამპმა და პუტინმა

“პოლიტიკური ექსპერტი კორნელი კაკაჩია მიიჩნევს, რომ ეს შეხვედრა იყო გაცნობითი და დაგეგმილი იმისთვის, რომ პრეზიდენტებს ერთმანეთის პოზიციები გაეგოთ.
შეხვედრაზე პუტინმა და ტრამპმა განიხილეს სირიაში მიმდინარე ომი, ისრაელსა და პალესტინას შორის არსებული კონფლიქტი, ისაუბრეს ირანის ბირთვულ შეთანხმებაზე, უკრაინის კრიზისზე, განიხილეს “ჩრდილოეთის ნაკად-2-ის” ბედი და ასევე რუსეთის ჩარევის საკითხი ამერიკის შეერთებულ შტატებში გამართულ არჩევნებში”, – აღნიშნავს გამოცემა.

“კორნელი კაკაჩია აცხადებს, რომ ეს შეხვედრა იმისთვის იყო გამართული, რომ ქვეყნების ლიდერებს საკუთარი პოზიციები მკაფიოდ დაეფიქსირებინათ: “მგონია, რომ ამ მხრივ სამიტმა თავისი მოვალეობა შეასრულა, რადგან მოლოდინი იმისა, რომ რაიმე კონკრეტულ შედეგს გამოიღებდა შეხვედრა, არ არსებობდა. ალბათ ლიდერები შეთანხმდებოდნენ იმაზე, რომ შემდეგ შეხვედრებზე უკვე კონკრეტული თემატიკა განიხილონ, მათ შორის ის მნიშვნელოვანი თემები, რომლებზეც ამ შეხვედრის დროს ვერ მოხერხდა საუბარი. სავარაუდოდ, მათ მონიშნეს გარკვეული კონტურები და ის საკითხები, რომლებზეც მომავალში აპირებენ მუშაობას.”-აღნიშნა კაკაჩიამ. მისივე თქმით, ტრამპის განცხადება იმასთან დაკავშირებით, რომ იმედოვნებს ამ სამიტის შემდეგ რუსეთთან ურთიერთობის გამოსწორებას არაფრის მომცემია, რადგან მსგავსი განცხადებები ადრეც გაკეთებულა: “მსგავსი განცხადებები ჩვენ გვახსოვს. ჯერ კიდევ ჯორჯ ბუშ უმცროსი აკეთებდა თავის დროზე სხვადასხვაგვარ იმედის მომცემ განცხადებებს პუტინთან შეხვედრის შემდეგ, მაგრამ პიროვნული ურთიერთობები ხანდახან არ ნიშნავს, რომ ეს ლიდერები აუცილებლად შეეწყობიან.” “ალბათ გარკვეული დრო არის საჭირო იმისათვის, რომ გავიგოთ რას მოიტან ეს პირველი კონტაქტი და შედგება თუ არა მათ შორის დიალოგი ან როგორ წავა მათი პერსონალური ურთირეთობები. ტრამპი ზოგადად ექსცენტრიული პოლიტიკოსია პუტინი კი ცნობილი, ასე ვთქვათ, მზვერავი, აქედან გამომდინარე, მას აქვს უფრო მეტი გამოცდილება პოლიტიკის სხვადასხვა ნიუანსებთან დაკავშირებით.”- განაგრძობს გამოცემა.

“შეგახსენებთ, რომ რუსეთისა და ამერიკის შეერთებული შტატების პრეზიდენტების შეხვედრა ფინეთის დედაქალაქ ჰელსინკში პრეზიდენტის სასახლეში გაიმართა. ისტორიულ სამიტს ვლადიმერ პუტინსა და დონალდ ტრამპს შორის წინ უსრებდა პროტოკოლით გათვალისწინებული შეხვედრა ჟურნალისტებისთვის. შეხვედრაზე პუტინმა განაცხადა, რომ მოვიდა დრო მნიშვნელოვანი თემების განსახილველად, ხოლო დონალდ ტრამპმა თავისი გამოსვლა დაიწყო იმის აღნიშვნით, რომ მთელი მსოფლიოა დაინტერესებული მოსკოვსა და ვაშინგტონს შორის კარგი ურთიერთობების ჩამოყალიბებით. ტრამპმა აღნიშნა, რომ შეხვედრაზე სურს საუბარი ვაჭრობასთან დაკავშირებით, სამხედრო საკითხებზე (მათ შორის ორივე ქვეყნის ბირთვულ პოტენციალზე) და ჩინეთზე. გარდა ამისა, ამერიკის შეერთებული შტატების პრეზიდენტმა მიულოცა პუტინს ” შესანიშნავი მსოფლიო საფეხბურთო ჩემპიონატის ჩატარება”. დაგეგმილი საათნახევრის მაგივრად პრეზიდენტების პირისპირი შეხვედრა ორი საათისა და ათი წუთის განმავლობაში გაგრძელდა. პრეზიდენტებს შორის გამართული დახურული შეხვედრის შემდეგ დონალდ ტრამპმა ჟურნალისტებს განუცხადა: “მე მგონიას, რომ ეს არის ყველასთვის ძალიან კარგი დასაწყისი”, – დასძენს გამოცემა.

“დახურული შეხვედრის შემდეგ 1 საათისა და 45 წუთის განმავლობაში მიმდინარეობდა გრაფიკით გათვალისწინებული მოლაპარაკებები გაფართოებული შემადგენლობით, რომელსაც პრეზიდენტების გარდა ესწრებოდნენ რუსეთის ფედერაციის საგარეო საქმეთა მინისტრი სერგეი ლავროვი და ამერიკის შეერთებული შტატების სახელმწიფო მდივანი მაიკლ პომპეო. შეხვედრის დასრულების შემდეგ გამართულ პრესკონფერენციაზე დონალდ ტრამპმა განაცხადა, რომ ურთიერთობები ორ ქვეყანას შორის არასოდეს ყოფილა ამაზე უარესი, თუმცა ის იმედოვნებს, რომ სიტუაცია სამიტის შემდეგ შეიცვალა: “დიპლომატია და ურთიერთქმედება უკეთესია, ვიდრე კონფლიქტი და დაპირისპირება, ხოლო მოსკოვსა და ვაშინგტონს შორის დიალოგი მსოფლიოს ინტერესებს პასუხობს. ურთიერთობები ორ ქვეყანას შორის არასოდეს ყოფილა ამაზე უარესი, მაგრამ 4 საათის წინ ყველაფერი შეიცვალა. მე ამის მჯერა.”-თქვა ტრამპმა. თავის მხრივ, რუსეთის პრეზიდენტმა პრესკონფერენციაზე გადაჭრით უარყო აშშძ-ში გამართულ არჩევნებში რუსეთის ჩარევა და აღნიშნა, რომ უკრაინაში განვითარებულ სიტუაციასთან დაკავშირებით, რომ „მნიშვნელოვანია მინსკის შეთანხმებების შესრულება”. პუტინის თქმით, მიუხედავად იმისა, რომ კონკრეტული გადაწყვეტილებების ამ შეხვედრაზე არ მიუღიათ, პრეზიდენტებმა გადადგეს პირველი ნაბიჯი ამ მიმართულებით”, – წერს სტატიის ავტორი.