მალხაზ მაჩალიკაშვილი სახელმწიფო უსაფრთხოების სამსახურმა დაკითხვაზე უკვე მესამედ დაიბარა. როგორც „ინტერპრესნიუსს“ მისმა ადვოკატმა ქეთი ჩუთლაშვილმა განუცხადა, მალხაზ მაჩალიკაშვილი ტერორიზმის მხარდაჭერის საქმეზე მიმდინარე გამოძიების ფარგლებში განმეორებით დაიკითხება. ადვოკატის აზრით, საგამოძიებო ორგანოს ინტერესი შესაძლოა მისთვის აქტიურობაში ხელის შეშლა იყოს, რადგან საკუთარი შვილის სიცოცხლის ხელყოფის ფაქტზე ობიექტურ გამოძიებას ითხოვს.
„მალხაზ მაჩალიკაშვილი ტერორიზმის მხარდაჭერის საქმეზე მიმდინარე გამოძიების ფარგლებში დაიკითხება განმეორებით. წინა დაკითხვაზე კითხვები ვერ ამოწურეს და დღეს გაგრძელდება. წინა ჯერზე გამოძიების მიერ მისთვის დასმული კითხვები შეეხებოდა ამ საქმეზე უკვე ბრალდებულ პირებსა და მათთან შემხებლობას.
ვფიქრობთ, რომ ამ ეტაპზე არ არის მიზანშეწონილი მისი დაკითხვა იმიტომ, რომ ამ საქმეზე კონკრეტული პირების მიმართ განაჩენი უკვე გამოტანილია. თუ საჭირო იყო და საგამოძიებო ორგანოს მალხაზ მაჩალიკაშვილის მიმართ კითხვები ჰქონდა, გამოძიების საწყის ეტაპზევე უნდა დაეკითხა. მათი განმარტება ის არის, რომ ახლა ჩათვალეს საჭიროდ და ახლა იკითხება. როგორც გვითხრეს, სავარაუდოდ ეს იქნება ბოლო დაკითხვა, თუ დღეს ამოიწურება ყველა კითხვა.
მალხაზ მაჩალიკაშვილი საკმაოდ აქტიურად ითხოვს მისი შვილის სიცოცხლის ხელყოფის ფაქტზე გამოძიების ობიექტურად წარმართვას. შესაძლოა, საგამოძიებო ორგანოს ინტერესი იყოს, რომ მას ამ აქტიურობაში ხელი შეუშალოს,“ – განაცხადა ქეთი ჩუთქლაშვილმა.