“ემპათიას“ დასკვნა – არჩილ ტატუნაშვილი ცხინვალში სხვადასხვა მეთოდით აწამეს, რამაც მისი გარდაცვალება გამოიწვია

საქმე „ტატუნაშვილი რუსეთის ფედერაციის წინააღმდეგ“ ადამიანის უფლებათა ევროპულ სასამართლოში ხვალ გაიგზავნება. ამის შესახებ ინფორმაციას ცენტი „ემპათია“ ავრცელებს. მათივე ინფორმაციით, ცენტრ „ემპათიას“ ექსპერტთა ჯგუფმა, 10 ექსპერტის მონაწილეობით, არჩილ ტატუნაშვილის წამებისა და ძალადობრივი სიკვდილის ფაქტთან დაკავშირებით კომპლექსურ – კომისიური სასამართლო ექსპერტიზა დაასრულა.
„ემპათიის“ ცნობით, აღნიშნული დასკვნით დადასტურებულია, რომ არჩილ ტატუნაშვილი ქალაქ ცხინვალში პატიმრობისას აწამეს წამების სხვადასხვა მეთოდის გამოყენებით, რამაც გამოიწვია მისი გარდაცვალება.
დასკვნა წარმოადგენს მთავარ მტკიცებულებას სარჩელში ტატუნაშვილი რუსეთის ფედერაციის წინააღმდეგ, რომელიც ცენტრ „ემპათიას“ მიერ მომზადდა და 22 აგვისტოს ადამიანის უფლებათა ევროპულ სასამართლოში გაიგზავნება; ევროკონვენციის მე – 2 მუხლის (სიცოცხლის უფლება), მე – 3 მუხლის (წამების აკრძალვა), ასევე მე – 5 (თავისუფლების უფლება), მე – 8 (პირადი და ოჯახური ცხოვრების პატივისცემა) და მე – 13 მუხლების (ეფექტური ზომა) დარღვევისათვის. 
დასკვნა მომზადებულია საერთაშორისო სტანდარტების „სტამბოლის პროტოკოლი“, „მინესოტას პროტოკოლი“, მსოფლიო ჯანდაცვის ორგანიზაციის სიკვდილის მიზეზების დადგენის საერთაშორისო გაიდლაინისა და დაავადებათა საერთაშორისო კლასიფიკაციის, მე – 10 – ე გადასინჯვის შესაბამისად.