“ევროპული საქართველოს” მიერ მომზადებული დასკვნის პირველად ვერსია, რომელიც ხორავას ქუჩაზე მომხდარი მკვლელობის საქმეზე შექმნილი დროებით საგამოძიებო კომისიის წევრებმა წარმოადგინეს, არაკომპეტენტურია”, – ამის შესახებ ჟურნალისტებს კომისიის სხდომის დაწყებამდე, საპარლამენტო უმრავლესობის წევრმა, ანრი ოხანაშვილმა განუცხადა.
ამასთან, ანრი ოხანაშვილმა განმარტა, რომ “ევროპულმა საქართველომ” კომისიის მუშაობის გახანგრძლივება ერთი თვის ვადით ითხოვა.
“ვთვლით, რომ შესაძლებელი იყო ამ დოკუმენტის კომპეტენტურად დაწერა და შედგენა. დოკუმენტი, საბოლოო სახით, მიღებული არ არის და არსებული ვერსია ტოვებს არაკომპეტენტური სამართლებრივი დოკუმენტის შთაბეჭდილებას. შესაბამისად, ჩვენ მიგვაჩნია, რომ დოკუმენტი უნდა იყოს გაჯერებული სამართლებრივი არგუმენტებით, კონკრეტულ ფაქტებზე დაყრდნობით და დაცლილი უნდა იყოს ყოველგვარი პოლიტიკური ელფერისაგან. ის უნდა იყოს ობიექტური”, – აღნიშნა ოხანაშვილმა.
შეგახსენებთ, რომ ხორავას ქუჩაზე მომხდარი მკვლელობის საქმეზე მომზადებული დასკვნა უახლოეს მომავალში გამოქვეყნდება. პარლამენტის დროებითი საგამოძიებო კომისიის თავმჯდომარის, სერგი კაპანაძის განცხადებით, დასკვნაში ასახული იქნება ყველა ის საკითხი, რომელზეც კომისიის მუშაობისას, იყო დისკუსია, მათ შორის თემები, რომლებიც ეხება მაღალი თანამდებობის პირების პასუხისმგებლობის საკითხს.