თბილისის 51-ე საჯარო სკოლის დირექტორი ხორავას ქუჩაზე, მოზარდების მკვლელობის საქმესთან დაკავშირებით პარლამენტში შექმნილი დროებითი საგამოძიებო კომისიის დასკვნას არ ეთანხმება. ინფორმაციას 1tv ავრცელებს.
დასკვნის ერთ-ერთი პუნქტის თანახმად, 51-ე და პირველ ექსპერიმენტულ სკოლაში უსაფრთხოების მდგომარეობა ნორმებს ვერ აკმაყოფილებს.
51-ე სკოლის დირექტორი თინათინ ყენია მოზარდების მკვლელობის დღეს (2017 წლის 1 დეკემბერი) სკოლის დირექტორის მოვალეობის შემსრულებელი იყო. მისი თქმით, მკვლელობის დღეს სკოლაში საეჭვო არაფერი შეუმჩნევია და მის მიმართ კომისიის მხრიდან კითხვის ნიშნების არსებობას უსაფუძვლოდ მიიჩნევს.
“საეჭვო იმ დღეს არაფერი ხდებოდა სკოლაში. ბავშვებს აუცილებლად დავინახავდი 14:00 საათზე, რადგან 15 წუთით ადრე დამთავრდა პირველი ცვლა და დასრულდა გაკვეთილები. სკოლის ტერიტორიაზე 35 კი არა, უფრო მეტი ბავშვი იყო. ბავშვები, რომლებიც არ იყვნენ ჩემი სკოლის მოსწავლეები, იდგნენ სავალ ნაწილზე, სკოლის აივნიდან რამდენადაც შემეძლო რომ გამერჩია, საეჭვო იქ არაფერი დამინახავს. მიუხედავად ამ ყველაფრისა, რომ ეს ბავშვები იდგნენ იქ და არ ეკონტაქტებოდნენ ჩვენს მოსწავლეებს, მაინც ჩავაყენე მანდატური საქმის კურსში, რომ უცხო ბიჭები არიან და ნახეთ, ხომ არ არიან ჩვენი ბავშვებიც იქ მეთქი”,- განაცხადა თინათინ ყენიამ.
თინათინ ყენია ასევე არ ეთანხმება კომისიის დასკვნას იმის შესახებ, რომ სკოლის მანდატურებს ბულინგის ფაქტები გამოეპარათ.
„აბსოლუტურად ვემიჯნები კომისიის ამ მოსაზრებას. ინფორმაცია იმის შესახებ, რომ ვიღაც დაეჩაგრათ, სკოლას არ ჰქონია. რომ ჰქონოდა, შესაბამის ზომებს მივიღებდით. მანდატურებთან ყოველთვის აქტიურად ვთანამშრომლობდით. ვერ გეტყვით, რომ მანდატურმა რაიმე ვერ გააკეთა”,- აცხადებს თინათინ ყენია.
სკოლის დირექტორი ასევე არ ეთანხმება კომისიას იმაში, რომ სკოლაში სისტემური დარღვევები ხდებოდა.
1 სექტემბერს ხორავას ქუჩაზე მოკლული მოზარდების საქმეზე, პარლამენტის საგამოძიებო კომისიამ დასკვნის ნაწილი გამოაქვეყნა. ასევე გაავრცელეს სათვალთავლო კამერით დაფიქსირებული კადრების ფრაგმენტი, რომელშიც, მათი განმარტებით, ჩანს რა ხდებოდა ჩხუბის დროს.
პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა. პარლამენტის საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.
ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე – მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.
2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.
მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა, თანამდებობიდან გადადგა.