ნასვამი მძღოლი, რომელმაც გლდანში 27 წლის ქალი და 3 წლის ბავშვი იმსხვერპლა, ავარიის შემდეგ კი მიიმალა, დაკავებულია

სამართლადამცველებმა თბილისში, გლდანში მომხდარი ავტოსაგზაო შემთხვევის გამო, რა დროსაც ორი ადამიანი ადგილზევე გარდაიცვალა, 26 წლის ლ. ა. დააკავეს.
როგორც შს სამინისტროში აცხადებენ, ავტომანქანის მძღოლი, რომელიც სამართალდამცველებმა დააკავეს, საჭეს ალკოჰოლის შემოქმედების ქვეშ მართავდა.
უწყების ინფორმაციით, გარდაცვლილები 27 წლის გოგონა და 3 წლის ბავშვია.
„საპატრულო პოლიციის დეპარტამენტის თანამშრომლებმა, ჩატარებული საგამოძიებო მოქმედებების შედეგად, 1992 წელს დაბადებული ლ. ა. დააკავეს. დაკავებულს ბრალი ედება სიცოცხლისათვის საშიშ მდგომარეობაში მყოფის განსაცდელში მიტოვების და ტრანსპორტის მოძრაობის უსაფრთხოების ან ექსპლუატაციის წესის დარღვევის ფაქტზე, რამაც გამოიწვია ორი ან მეტი ადამიანის სიცოცხლის მოსპობა. ჩადენილი დანაშაული 8-დან 13 წლამდე ვადით თავისუფლების აღკვეთას ითვალისწინებს. გამოძიებამ დაადგინა, რომ ლ.ა. მიმდინარე წლის 11 სექტემბერს ალკოჰოლის ზემოქმედების ქვეშ მყოფი მართავდა საკუთარ ავტომანქანას, რა დროსაც ქვეითად მოსიარულეებს – 1991 წელს დაბადებულ ნ. მ.-ს და 2015 წელს დაბადებულ ნ. ჯ.-ს შეეჯახა, რომლებიც, მიღებული დაზიანებების შედეგად, ადგილზე გარდაიცვალნენ. მომხდარ ფაქტზე დანიშნულია შესაბამისი ექსპერტიზები. გამოძიება საქართველოს სისხლის სამართლის კოდექსის 128-ე მუხლით და 276-ე მუხლის მე-8 ნაწილით მიმდინარეობს, რაც სიცოცხლისათვის საშიშ მდგომარეობაში მყოფის განსაცდელში მიტოვებას და მთვრალ მდგომარეობაში ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია“, – ნათქვამია შს სამინისტროს მიერ გავრცელებულ ინფორმაციაში.