ზუგდიდში სალომე ზურაბიშვილის საარჩევნო შტაბი ზუგდიდის #20 საარჩევნო უბნიდან ამომრჩეველთა სამაგიდო სიის ნაწილის დაკარგვას “ნაციონალურ მოძრაობას” აბრალებს.
ზუგდიდის შტაბის უფროსის მოადგილე და სამეგრელო-ზემო სვანეთის მხარის ადმინისტრაციის უფროსი ლაშა გვასალია ამბობს, რომ “ნაციონალურ მოძრაობას” ჰქონდა ინფორმაცია, რომ ამ კონკრეტულ უბანზე მათი კანდიდატი აგებდა.
გვასალიას თქმით, დაძაბულობის დროს ოპოზიციის წარმომადგენლებმა სამაგიდო სიის ერთი გვერდი გაიტაცეს და დამალეს. გვასალია ამბობს, რომ ოპოზიციური პარტიის წევრები და დამკვირვებლები კომისიის მდივანს და რეგისტრატორებს თავს დაესხნენ, უბანზე ვითარება უკონტროლო გახდა და სავარაუდოდ სწორედ ამ დროს არის დაკარგული ამომრჩეველთა სამაგიდო სიის ერთი გვერდი.
საპირისპიროს ამტკიცებს “ნაციონალური მოძრაობა”. პარტიის წევრები აცხადებენ, რომ სიის ნაწილი იმიტომ გაქრა, რომ მათ მხარდამჭერებს კენჭისყრაში მონაწილეობა არ მიეღოთ. დაკარგული დოკუმენტი ამ დრომდე არ არის ნაპოვნი.
ზუგდიდის საარჩევნო #20 უბანზე, საიდანაც ამომრჩეველთა სიის ნაწილი დაიკარგა, სალომე ზურაბიშვილმა მოიგო.
ტელეკომპანია “იმედის” დაკვეთით GALLUP INTERNATIONAL-ის მიერ ჩატარებული ეგზიტპოლის შედეგების მიხედვით, სალომე ზურაბიშვილს 58%, გრიგოლ ვაშაძეს კი 42% აქვს.
დღეს საქართველოს მოსახლეობამ 5-ის ნაცვლად 6 წლით, პირდაპირი წესით ბოლოჯერ აირჩია ქვეყნის პრეზიდენტი.
პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ – 37,74%.
2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.