ამერიკელი მკვლევარი ლინკოლნ მიტჩელი საქართველოში საპრეზიდენტო არჩევნების მეორე ტურის შედეგების შეფასებისას აცხადებს, რომ გრიგოლ ვაშაძის დაკავშირება მიხეილ სააკაშვილთან, ვაშაძისთვის წამგებიანი აღმოჩნდა. მიტჩელის კომენტარს სააგენტო “ინტერპრესნიუსი” ავრცელებს.
მიტჩელის განცხადებით, სააკაშვილის გარემოცვის გარდა, ის საქართველოში არაპოპულარული რჩება და ნებისმიერს, ვინც მასთან დაახლოებულია, არჩევნების მოგება გაუჭირდება.
“სააკაშვილს მართლაც რომ ნდომებოდა „ქართული ოცნების“ ხელისუფლებიდან მოშორება, ის გაეცლებოდა ქართულ პოლიტიკას და საშუალებას მისცემდა „ქართული ოცნების“ ძლიერი ალტერნატივის შექმნას. რაც ჩვენ ვიხილეთ, იმაზე მეტყველებს, რომ სააკაშვილს ეს არ შეუძლია”, – განაცხადა ამერიკელმა მკვლევარმა.
ლინკოლნ მიტჩელის თქმით, ქართლულმა ოცნებამ მისი რესურსების მობილიზება შეძლო და ეს რბოლა მოიგო.
“ქართულმა ოცნებამ” მოიგო ეს რბოლა, თუმცა თუ ბრძენები არიან, მათ თავიანთი ძალისხმევა უნდა გააორმაგონ, რათა აღმოფხვრან კორუფცია, დააჩქარონ რეფორმები და უფრო აქტიურად მოახდნონ ქართველი ხალხისთვის თავიანთი მიღწევების კომუნიკაცია”, – თქვა ამერიკელმა მკვლევარმა ლინკოლნ მიტჩელმა.
ცესკომ საპრეზიდენტო არჩევნების მეორე ტურის წინასწარი შედეგები გამოაქვეყნა,რომლის მიხედვითაც, პრეზიდენტობის დამოუკიდებელ კანდიდატს სალომე ზურაბიშვილს აქვს 57% (262 826 ხმა), ხოლო „ნაციონალური მოძრაობის“ კანდიდატ გრიგოლ ვაშაძეს – 43% (195 305 ხმა).
ტელეკომპანია “იმედის” დაკვეთით GALLUP INTERNATIONAL-ის მიერ ჩატარებული ეგზიტპოლის შედეგების მიხედვით, სალომე ზურაბიშვილს 58%, გრიგოლ ვაშაძეს კი 42% აქვს.
დღეს საქართველოს მოსახლეობამ 5-ის ნაცვლად 6 წლით, პირდაპირი წესით ბოლოჯერ აირჩია ქვეყნის პრეზიდენტი.
პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ – 37,74%.