5 წელი და 3 თვე — ბუტა რობაქიძის საქმეზე გურამ დონაძეს პატიმრობა მიესაჯა. მოსამართლემ გადაწყვეტილება დღეს გამოაცხადა. დონაძე სასამართლო დარბაზშივე დააკავეს. გამოძიება დონაძეს სამსახურებრივი უფლებამოსილების ბოროტად გამოყენებას ედავებოდა.
ვიდრე, მოსამართლე გადაწყვეტილებას კითხულობდა, შინაგან საქმეთა სამინისტროს საზოგადეობასთან ურთიერთობის სამსახურის ყოფილმა უფროსმა გურამ დონაძემ, სოციალურ ქსელში ორი სიტყვის დაწერა მოასწრო: – “1937 წელი”
მსჯავრდებული სასამართლოს დარბაზში შესვლამდე იმედს იტოვებდა, რომ სასამართლო სამართლიან და პოლიტიკურ გადაწყვეტილებას არ მიიღებდა.
მოსამართლის მიერ განაჩენის გამოცხადებას სასამართლო დარბაზში დაპირისპირება მოჰყვა.
ერთმანეთს რობაქიძის ოჯახის წევრები და შს სამინისტროს ყოფილი მაღალჩინოსნების ოჯახის წევრები დაუპირისპირდნენ.
სასამართლომ ბუტა რობაქიძის საქმეზე ყოფილი მაღალჩინოსნები – დავით იაშვილი, გურამ დონაძე, ზურა მიქაძე, ირაკლი ფირცხალავა და ზაზა ბაქრაძე დამნაშავედ ცნო. აღნიშნულთან დაკავშირებით თბილისის საქალაქო სასამართლომ განცხადება გაავრცელა:
„თბილისის საქალაქო სასამართლომ დაასრულა სისხლის სამართლის საქმის განხილვა ბუტა რობაქიძის საქმეზე და ბრალდებულების – ზაზა ბ.-ს, ზურაბ მ.-ს, გურგენ დ.-ს, ირაკლი ფ.-ს და დავით ი.-ს მიმართ გამამტყუნებელი განაჩენი დაადგინა.
ბრალდებულებს, ბრალად ედებოდათ მოხელის მიერ სამსახურებრივი უფლებამოსილების ბოროტად გამოყენება საჯარო ინტერესის საწინააღმდეგოდ, თავისთვის და სხვისთვის გამორჩენის მისაღებად, რამაც ფიზიკური პირის უფლების, საზოგადოებისა და სახელმწიფოს კანონიერი ინტერესის არსებითი დარღვევა გამოიწვია, ჩადენილი ძალადობითა და დაზარალებულის პირადი ღირსების შეურაცხყოფით. ზაზა ბ.-სა და ზურაბ მ.-ს ასევე ბრალად ედებოდათ, ცეცხლსასროლი იარაღის (გარდა გლულვლულიანი სანადირო თოფისა) და საბრძოლო მასალის მართლსაწინააღმდეგო გადაზიდვა.
სასამართლომ საქმის არსებითად განხილვისას გამოკვლეული მტკიცებულებებით, დადასტურებულად მიიჩნია, 2004 წლის 24 ნოემბერს, საქართველოს შს სამინისტროს ყოფილი მაღალჩინოსნების მხრიდან სამსახურებრივი უფლებამოსილების ბოროტად გამოყენება, კერძოდ, მტკიცებულებების ხელოვნურად შექმნისა და პროცესუალური დოკუმენტების განმტკიცების მიზნით, რეალური ფაქტების დამახინჯება და უკანონოდ დაკავებული ახალგაზრდებისათვის სხვადასხვა ცეცხლსასროლი იარაღებისა და საბრძოლო მასალის ჩადება.
ბრალის აღიარებისა და გამოძიებასთან თანამშრომლობის საფუძველზე, სასამართლომ დაამტკიცა ბრალდებულ ზაზა ბ.-სა და ბრალდების მხარეს შორის მიღწეული საპროცესო შეთანხმება, რომლის თანახმადაც გამამტყუნებელი განაჩენით ბრალდებულს საბოლოო სასჯელად განესაზღვრა 4 წლითა და 6 თვით თავისუფლების აღკვეთა, რაც ჩაეთვალა პირობით, იმავე გამოსაცდელი ვადით.
ზურაბ მ. გურგენ დ. ირაკლი ფ. და დავით ი. სასამართლომ დამნაშავედ ცნო წარდგენილ ბრალდებაში და მათ მიმართ გამამტყუნებელი განაჩენი დაადგინა. ბრალდებულებს სასჯელის სახედ და ზომად, „ამნისტიის შესახებ“ საქართველოს კანონის გამოყენებით, საბოლოოდ 5 წლითა და 3 თვით თავისუფლების აღკვეთა განესაზღვრათ“, – აცხადებენ საქალაქო სასამართლოში.