ონში დაჭრილი ნოდარ ბურდილაძის და თავისი შვილის ფეიბუქგვერდიდან პოსტს აქვეყნებს.
“ძალიან გთხოვთ ყველას, თავი შეიკავეთ ჩემი ძმის თემის საზოგადოებისთვის სათავისოდ, არასწორად მიწოდებისაგან. რაც შეეხება ემზარ საბანაძეს, ჩვენ ჯერ არ ვიცით, რატომ დაიგვიანა რეანიმობილმა, რადგან ამისთვის ვერ მოვიცალეთ. ისევ ვიბრძვით ნოდოს სიცოცხლისთვის.
ერთი კი ვიცი: წამალი, რომელიც წუთებში წყვეტდა ჩემი ძმის სიცოცხლეს, რომ არა ბატონი კახა საბანაძის გვერდში დგომა და მის მიერ ჩვენი ტკივილის გულთან მიტანა, ჩაკეტილი გზის გამო. ჩვენამდე ვერ მოაღწევდა.
ის ფეხით გადმოიტანეს უღელტეხილზე პოლიციელებმა. უნადურობაა ამის არდანახვა. უმადურობა კი ყველაზე ცუდ თვისებად მიმაჩნია პირადად მე.
ასევე მადლობა თქვენ, ჩემი ნოდოს თანაპარტიელებო. მტკივა ამ ამბავში მხარეთა მინიშნება… მაპატიეთ ტონი… მე თქვენ მიყვარხართ, ადამიანებო”, – წერს ნოდარ ბურდილაძის და.
ცნობისათვის:
შინაგან საქმეთა სამინისტროს განცხადება
გვსურს, საზოგადოებას კიდევ ერთხელ მივაწოდოთ ინფორმაცია მიმდინარე წლის 22 ნოემბერს ონში მომხდარ ფაქტზე.
ბრალდებულის დაკავება განხორციელდა დანაშაულის ჩადენიდან უმოკლეს დროში. შინაგან საქმეთა სამინისტროს მიერ ჩატარებული გამოძიებით (მათ შორის თვითმხილველების ჩვენებებით), ამ ეტაპზე დგინდება, რომ დანაშაული პოლიტიკური მოტივით არ არის ჩადენილი და კონფლიქტი ყოფით ნიადაგზე წარმოიშვა. ამასთან, სიმართლეს არ შეესაბამება კონფლიქტის დეტალების შესახებ ცალკეული პირების მიერ მედიასაშუალებებით გავრცელებული ინფორმაცია.
გამოძიებით დადგენილია, რომ 1965 წელს დაბადებული ბრალდებული 22 ნოემბერს, ღამის საათებში მივიდა მეგობართან გასაღების გამოსართმევად. ბრალდებული ქუჩიდან ხმამაღლა ეძახდა მეგობარს. აღნიშნულ ხმაურზე იქვე მეზობლად მცხოვრებმა ნოდარ ბურდილაძემ საკუთარი სახლის აივნიდან გადმოიხედა და ხმაურის გამო შენიშვნა მისცა ბრალდებულს, რაზეც არაფხიზელ მდგომარეობაში მყოფი ბრალდებული გაღიზიანდა. მათ შორის სიტყვიერი დაპირისპირება დაიწყო, რაც შემდგომ ფიზიკურ დაპირისპირებაში გადაიზარდა. ნოდარ ბურდილაძეს ბრალდებულმა კ.ი.-მ დანით ჭრილობა მიაყენა. დაზიანების ხარისხის და მიყენების მექანიზმის დასადგენად დანიშნულია შესაბამისი ექსპერტიზები.
სამართალდამცველებმა, ცხელ კვალზე ჩატარებული ოპერატიულ-სამძებრო ღონისძიებების შედეგად, კ. ი. მომხდარიდან მალევე, მკვლელობის მცდელობის ბრალდებით დააკავეს. იმის გათვალისწინებით, რომ საქმეში ფიგურირებს ფაქტის შემსწრე, შსს-ს სსიპ დაცვის პოლიციის დეპარტამენტის იმერეთი-გურიის სამმართველოს თანამშრომელი, საქმე გამოსაძიებლად გადაეცა საქართველოს პროკურატურას, ხოლო დაცვის პოლიციის თანამშრომელს გამოძიების დასრულებამდე შეუჩერდა სამსახურებრივი უფლებამოსილება.