პარტია “ქართული ოცნება – დემოკრატიული საქართველოს” პოლიტსაბჭოს ყოფილი წევრი არმაზ ახვლედიანი აცხადებს, რომ მას ფარულად უსმენენ.
“მე მინდა ვუთხრა “ოცნების” ხელმძღვანელობას და მის მიღმა მყოფ სამართალდამცველებს, რომ მოუძველდათ მეთოდები. დღესაც, ასე აშკარად და დაუფარავად მოსმენა და ასეთი ფორმების გამოყენება პოლიტიკური თანამშრომლების თუ ოპონენტების მისამართით, სრულიად მიუღებელი და წარმოუდგენელია. მათ ავიწყდებათ რომ 2016 წელია. ასეთი აშკარა, პირდაპირი ჩართულობა შესაბამისი სამსახურების მხრიდან მე არ მახსენდება ბოლო 20-22 წლის განმავლობაში. მე მინდა გავაფრთხილო მკაცრად ყველა, ვინც ამას აკეთებს, რომ ეს თამაში შეიძლება ძალიან ცუდად დასრულდეს. მე მაქვს გამოცდილება ასეთ დროს როგორ უნდა მოვიქცე და ისიც კარგად ვიცი, ამის წამომწყებები და ინიციატორები როგორ ასრულებენ, ამიტომ არავის ვურჩევ“, – განაცხადა ახვლედიანმა.
მისი თქმით, ამ შემთხვევაში ის საუბრობს პირადად მის მოსმენაზე, თუმცა აცხადებს, რომ სხვებსაც უსმენენ.
„ბევრს უსმენენ, მაგრამ მე ჩემ თავზე შემიძლია ვისაუბრო და იმაზე, რომ ჩემს ახლობლებს, მეგობრებს აფრთხილებენ, რომ ჩემთან საუბარი და ურთიერთობა საფრთხილოა. ეს სრულიად საკმარისია იმისთვის, რომ ვიფიქრო, თუ რას აპირებენ დღეს შესაბამისი სამსახურები, არ ვიცი კონკრეტულად რომელი“, – განაცხადა არმაზ ახვლედიანმა.