ბათუმის ინფექციურ საავადმყოფოში კარანტინი გამოცხადდა, შენობაში მნახველების შესვლა შეიზღუდა. ეს გადაწყვეტილება საავადმყოფოს ადმინისტრაციამ სეზონური ვირუსის ფონზე გარზდილი მიმართვიანობის გამო მიიღო.
“აუცილებელია შეზღუდვის დაწესება, რომ არ მოხდეს ვირუსის გავრცელება სხვა პირებზე”, – განმარტა საავადმყოფოს დირექტორმა ციური აბულაძემ.
მისივე თქმით, ინფექციურ განყოფილებაში მუშაობის გრაფიკი შეიცვალა, ღამის ცვლას ექიმების რაოდენობა დაემატა. ამ დროისთვის კლინიკაში გრიპის ვირუსით 30-მდე პაციენტია მოთავსებული, აქედან 7 ბავშვი და სამი ორსულია.
გრიპისა და გრიპის მაგვარი ვირუსით აჭარაში 200-მდე ადამიანი მკურნალობს. H1N1 გრიპი კი ლაბორატორიულად 11 ადამიანს დაუდასტურდა.
კარანტინი ფოთის კლინიკურ საავადმყოფოშიც გამოცხადდა.
ქუთაისში კი კლინიკა “მედიქალ სითიში” რესპირატორული ვირუსული ინფექციის დიაგნოზით 83 ადამიანი მკურნალობს. ამ დროისთვის მათ შორის დადასტურებული H1N1 შემთხვევა არ ფიქსირდება და ძირითადი დიაგნოზი A ტიპის ვირუსია.
გრიპის სტატისტიკა წინა კვირის მონაცემებთან შედარებით, 21 ერთეულით შემცირებულია.
მედიკოსები მოქალაქეებს კიდევ ერთხელ აფრთხილებენ, რომ მაღალი სიცხისა და გრიპის სიმპტომების აღმოჩენისთანავე დაუყოვნებლივ ოჯახის ექიმს მიმართონ.
რამდენიმე დღის წინ, ჯანდაცვის მინისტრმა დავით სერგეენკომ განაცხადა, რომ გაფართოვდა იმ პირთა წრე, რომლებიც ანტივირუსულ პრეპარატ „ტამიფლუს“ უფასოდ მიიღებენ. ასევე ქვეყანაში ამ პრეპარატის დეფიციტის გამო შექმნილი ვითარებიდან გამომდინარე, სამინისტრო “ტამიფლუს” აფთიაქებს საკუთარი მარაგიდან მიაწვდის.
ქვეყნის მასშტაბით აფთიაქებში “ტამიფლუს” მარაგი 10 იანვრიდან შეივსება. მანამდე კი პრეპარატი „ტამიფლუ“, რომელიც გრიპის სამკურნალოდ გამოიყენება, 6 იანვრიდან თბილისის მასშტაბით ოთხ სააფთიაქო ქსელში – „პე-ეს-პეში“, „ავერსში“, „ჯი-პი-სისა“ და „ფარმადეპოში“ იყიდება.
შეგახსენებთ, რომ უფასოდ “ტამიფლუს” მისაღებად აუცილებელია, რომ ადგილზე მოქალაქემ წარადგინოს ექიმის დანიშნულება (ფორმა 100).