ცნობილი ქართველი დიპლომატი, 2013-2017 წლებში ავსტრიის რესპუბლიკაში საქართველოს საგანგებო და სრულუფლებიანი ელჩი, ეუთო-სადა ვენაში განლაგებულ საერთაშორისო ორგანიზაციებში საქართველოს მუდმივი წარმომადგენელი კონსტანტინე ზალდასტანიშვილი ვენაში, წმინდა სამების ბერძნულ ტაძარში გამართულ ღონისძიებაზე გაიხსენეს.
საქართველოს საგარეო საქმეთა სამინისტროს ინფორმაციით, საღამო ავსტრიის რესპუბლიკაში საქართველოს საელჩოს ორგანიზებით მოეწყო და ის კონსტანტინე ზალდასტანიშვილის გარდაცვალების წლისთავს მიეძღვნა. ღონისძიების ფარგლებში მიღება გაიმართა, რომელსაც კონსტანტინე ზალდასტანიშვილის ოჯახის წევრები, ავსტრიის რესპუბლიკის საკანონმდებლო და აღმასრულებელი ხელისუფლების, დიპლომატიური კორპუსის, აკადემიური წრეებისა და ქართული დიასპორის წარმომადგენლები ესწრებოდნენ.
„გამოვხატავთ მადლიერებას კონსტანტინე ზალდასტანიშვილის – ჩვენთვის უბრალოდ კოტეს მიმართ, მის მიერ ქვეყნის განვითარებასა და ავსტრია-საქართველოს ორმხრივი ურთიერთობების მნიშვნელოვნად გაღრმავების საქმეში შეტანილი წვლილისთვის. ის მუდამ დარჩება ჩვენს გულებში. მისი სახელი ავსტრიას არ დაავიწყდება“, – განაცხადა ღონისძიებაზე სიტყვით გამოსვლისას ავსტრიის პარლამენტის წევრმა და ავსტრიის სავაჭრო პალატის გენერალურმა მდივანმა, კარლჰაინც კოფვმა.
ღონისძიებაზე ზალდასტანიშვილის შესახებ სლოვაკეთის რესპუბლიკაში საქართველოს საგანგებო და სრულუფლებიანმა ელჩმა, რეზო გაჩეჩილაძემაც ისაუბრა.
„ჩვენ ძველი ქვეყანა ვართ, მაგრამ ახალგაზრდა სახელმწიფო, რომელიც მიისწრაფვის ევროპაში დამკვიდრებისთვის, სწორედ ასეთი ქვეყნისთვის შესაფერისი საუკეთესო დიპლომატიური თვისებებით იყო დაჯილდოებული კონსტანტინე ზალდასტანიშვილი. ის აკეთებდა ყველაფერს ქვეყნის განვითარებისთვის და არა მხოლოდ თავისი პროფესიონალიზმით, არამედ პიროვნული თვისებებით იზიდავდა ხალხს თავისკენ, მაშასადამე საქართველოსკენ. მიჭირს მასზე საუბარი წარსულში. ის ჩვენს გულებში მუდამ დარჩება“, – განაცხადა რეზო გაჩეჩილაძემ.
ასევე, სტუმრებს სიტყვით მიმართეს ავსტრიის რესპუბლიკაში საქართველოს საგანგებო და სრულუფლებიანმა ელჩმა, ეუთო-სა და ვენაში განლაგებულ საერთაშორისო ორგანიზაციებში საქართველოს მუდმივმა წარმომადგენლმა, დავით დონდუამ, ეუთო-ს საპარლამენტო ასამბლეის პრეზიდენტმა, გიორგი წერეთელმა, ეუთო-ში კანადის მუდმივმა წარმომადგენელმა, ნატაშა კაერმა და ავსტრიის რესპუბლიკის ევროპის, ინტეგრაციისა და საგარეო საქმეთა აღმოსავლეთ ევროპის, სამხრეთ კავკასიის, ცენტრალური აზიის, ევროკავშირის სამეზობლო პოლიტიკისა და აღმოსავლეთის პარტნიორობის დეპარტამენტის დირექტორმა, კატარინა ვიზერმა. ღონისძიების სტუმრებმა კიდევ ერთხელ გაუსვეს ხაზი კონსტანტინე ზალდასტანიშვილის წვლილს ქართული დიპლომატიის განვითარებისა და ქვეყნის მნიშვნელოვანი საგარეო წარმატებების მიღწევის საქმეში, განსაკუთრებით აღინიშნა ელჩის დამსახურება ბოლო პერიოდში საქართველო-ავსტრიის ორმხრივი ურთიერთობების განვითარებაში.
ხსოვნის საღამოზე, ვენის წმინდა სამების ბერძნულ ტაძარში კოტე ზალდასტანიშვილისმოსახსენებელი პანაშვიდიც გადაიხადეს.