განათლების, მეცნიერებისა და კულტურის კომიტეტის თავმჯდომარე მარიამ ჯაში ათასწლეულის გამოწვევის ფონდის მიერ ზესტაფონში რეაბილიტირებული მეშვიდე და მეექვსე საჯარო სკოლების ოფიციალური გახსნის ცერემონიაში მონაწილეობდა.
ლენტის საზეიმოდ გაჭრის შემდეგ მან განათლების, მეცნიერების, კულტურისა და სპორტის მინისტრის მოადგილესთან, ნათია ზედგინიძესთან და ათასწლეულის გამოწვევის ფონდის აღმასრულებელ დირექტორთან, მაგდა მაღრაძესთან ერთად სკოლების რეაბილიტირებული ინფრასტრუქტურა დაათვალიერა.
ღონისძიებაში მონაწილეობდნენ იმერეთის გუბერნატორი, შავლეგო ტაბატაძე და ზესტაფონის მერი, კახა მახათაძე. სტუმრები აღნიშნული საჯარო სკოლების დირექტორებს, პედაგოგებსა და მოსწავლეებს შეხვდნენ.
მარიამ ჯაშის ინფორმაციით, ათასწლეულის გამოწვევის ფონდმა საქართველოს საჯარო სკოლების რეაბილიტაციის პროექტის ფარგლებში, 2015 წლიდან დღემდე სრული რეაბილიტაცია ჩაუტარა 70 საჯარო სკოლას იმერეთის, მცხეთა-მთიანეთის, შიდა ქართლის, სამცხე-ჯავახეთის, რაჭა-ლეჩხუმი-ქვემო სვანეთის, ქვემო ქართლის, კახეთის რეგიონებში და აჭარაში. მისი განცხადებით, მიმდინარეობს საჯარო სკოლების რეაბილიტაცია აჭარის, დასავლეთ საქართველოს და კახეთის რამდენიმე სკოლაში, რომელიც 2019 წლის ივლისამდე დასრულდება.
„2019 წლის საგაზაფხულო სემესტრისთვის ათასწლეულის გამოწვევის ფონდმა დაასრულა 11 საჯარო სკოლის სრული რეაბილიტაცია, მათ შორისაა, ზესტაფონის მეექვსე და მეშვიდე საჯარო სკოლები. მნიშვნელოვანია, რომ მოსწავლეები განახლებულ, გაუმჯობესებულ საკლასო ოთახებსა და ლაბორატორიებში გააგრძელებენ სწავლას. წარმატებების მიღწევას. მინდა მივულოცო აღნიშნული სკოლების თითოეულ მოსწავლეს, მშობლებს, პედაგოგებსა და დირექციას“, – განაცხადა მარიამ ჯაშმა.
საჯარო სკოლების რეაბილიტაციას აფინანსებს აშშ-ის მთავრობა, ათასწლეულის გამოწვევის კორპორაციის (MCC) მეორე, 140 მილიონი აშშ დოლარის კომპაქტით/გრანტით. ჯამში, საჯარო სკოლების რეაბილიტაციისთვის კომპაქტიდან 54 მლნ აშშ დოლარის ბიუჯეტია გამოყოფილი. პროექტის შედეგად 37 ათასზე მეტი მოსწავლისთვის გაუმჯობესდება სასწავლო გარემო საქართველოს რეგიონებში არსებულ საჯარო სკოლებში.