უფლებადამცველმა სოფო ხორგუანმა სოციალური ქსელის საშუალებით სახალხო დამცველი, ნინო ლომჯარია გააკრიტიკა.
ხორგუანი თვლის, რომ სახალხო დამცველმა ოფისის დაქირავებისთვის 34 ათასი დოლარი არ უნდა გადაიხადოს. ხორგუანი თვლის, რომ აღნიშნული პრობლემა მთავრობის მოსაგვარებელია.
“34 ათას დოლარად თვეში რომ ოფისს ქირაობს ომბუდსმენი, შენ რას იზამდი, მთავრობამ რომ შენობა არ მისცა, ავარიულში დარჩენა საშიში იყოო, იმათ გასაგონად ვიტყვი. მე სეფას გავშლიდი, მსუბუქი კონსტრუქციის ნაგებობას, მთავრობის კანცელარიის წინ, იქ დავსვამდი ყველა თანამშრომელს და ასე იქნებოდა მანამდე, სანამ ჩვენნარი ღატაკი ქვეყნის მთავარი უფლებადამცველისთვის ადგილს არ იპოვიდნენ შესაბამისს და არა 34 ათას დოლარად ნაქირავებს თვეში!
p.s. ომბუდსმენობა არ მინდოდა და არც ახლა მინდა.
p.p.s. უფლებადამცველობა იმხელა ტვირთია, თავგადადებას ითხოვს“, – წერს სოფო ხორგუანი.
აღნიშნულ პოსტს უფლებადამცველი ბაია პატარაია გამოეხმაურა და სოფო ხორგუანი გააკრიტიკა.
“მართლა სეფაში უნდა იჯდეს ეს ხორგუანი, აბა საკაბინეტო და საოფისე ტვინი მას არ აქვს. ომბუდსმენს რომ ელემენტარული სამუშაო პირობები არ აქვს ამ ქვეყანაში, მართლა ხელისუფლების მიერ მოწყობილი საბოტაჟია და სხვა არაფერი. ერთი შენობა არ გამოუყვეს და ხან სად არიან შეხიზნულები და ხან თავზე ენგრევათ შენობა.
ნორმალურ ქვეყანაში ასე არ ხდება, მაგრამ ვერ იტანს მთავრობა სახალხო დამცველის კრიტიკულ აპარატს და აწვალებს, როგორც შეუძლია. უმნიშვნელოვანეს როლს ასრულებს ომბუდსმენის ოფისი და მაინცდამაინც ომბუდსმენს რომ მიახტები – ქოცი ხარ, აბა რა ხარ?! სად აქვს ომბუდსმენს სეფაში წამოწოლის დრო, უსაქმური კი არ არის მთავრობასავით”,– წერს ბაია ბატარაია.
ბაია პატარაიას კრიტიკა სოფო ხორგუანმა უპასუხოდ არ დატოვა და სოციალურ ქსელში უპასუხა:
„ეს ფემინისტი ქალი, ბაია პატარაია, მაინც რამ გაამწარა ასე ძალიან?! 2010 წლიდან ჩემი კერძო კომპანია მაქვს, დღგ-საც ვიხდი, საშემოსავლოსაც, მოგების გადასახადსაც, პრო-ბონოც ვეხმარები მოქალაქეებს, ოფისიც მაქვს და კაბინეტიც და დოქტორანტურაშიც მიმიღეს შვეიცარიაში. 44 წლის ასაკში ჩოგბურთის თამაშიც ვისწავლე და თხილამურებზეც დავდექი და კიდევ ბევრი გეგმა მაქვს! ეს ქალი იცავს ქალების უფლებებს? ამან უნდა დაიცვას ჩემი უფლებები?! ასე დასდევენ ესენი მოქალაქეების გამოხატვის თავისუფლებას?“, – წერს ხორგუანი.