აზერბაიჯანის პრეზიდენტის ილჰამ ალიევის განცხადებით, დღევანდელი ვიზიტი და მოლაპარაკებები კიდევ ერთხელ ადასტურებს, რომ ორი ქვეყნის ურთიერთობებს კარგი მომავალი აქვს. ამის შესახებ აზერბაიჯანის პრეზიდენტმა სალომე ზურაბიშვილთან შეხვედრის შემდეგ განაცხადა.
მისივე თქმით, საქართველო და აზერბაიჯანი ტერიტორიული მთლიანობის საკითხთან დაკავშირებით ყველა საერთაშორისო ორგანიზაციაში სოლიდარობას უცხადებენ და მხარს უჭერენ ერთმანეთს.
“კეთილი იყოს თქვენი ჩამოსვლა აზერბაიჯანში. კიდევ ერთხელ გილოცავთ საპრეზიდენტო არჩევნებში გამარჯვებას და მოხარული ვარ, რომ არჩევნებიდან მოკლე დროში აზერბაიჯანში იმყოფებით. ეს იმის მაჩვენებელია, რომ ჩვენს ქვეყნებს შორის ურთიერთობებს დიდ მნიშვნელობას ანიჭებთ. ჩვენც, აზერბაიჯანიც საქართველოსთან ურთიერთობებს დიდ მნიშვნელობას ვანიჭებთ და მოხარული ვართ, რომ წარმატებით ვითარდება ეს ურთიერთობები. ჩვენი ხალხები საუკუნეების განმავლობაში ერთმანეთს გვერდში ედგნენ და ყოველთვის მეგობრულ, ძმურ ატმოსფეროში ცხოვრობდნენ. დღესაც ჩვენი მეგობრული და ძმური ურთიერთობები ჩვენი სახელმწიფოებს შორის ურთიერთობებისთვის მეტად მნიშვნელოვანია. ამ ძლიერ ფუნდამენტზე დამყარებულ ურთიერთობებზე ვაგებთ ახალ ურთიერთობებს და ვთანამშრომლობთ ყველა სფეროში. ჩვენი პოლიტიკური ურთიერთობები მაღალ დონეზეა და რეგულარულად ტარდება მაღალი დონის შეხვედრები, კონსულტაციები საერთაშორისო ორგანიზაციებში. ჩვენ ყოველთვის მხარს ვუჭერთ ერთმანეთს. რა თქმა უნდა თანამშრომლობის დიდი ნაწილი ენერგეტიკული სექტორს ეხება. ჩვენ ეს საკითხები განვიხილეთ. მინდა, ვთქვა, რომ ამ თანამშრომლობას დიდი ისტორია გააჩნია. ჩვენ ერთობლივი ძალისხმევით მნიშვნელოვან პროექტებს ვახორციელებთ“, – განაცხადა ილჰამ ალიევმა.
შეგახსენებთ, საქართველოს პრეზიდენტმა სალომე ზურაბიშვილმა აზერბაიჯანის რესპუბლიკაში ოფიციალური ვიზიტი დღეს დაიწყო.
ვიზიტის მიზანი აზერბაიჯანთან, როგორც მეზობელ სახელმწიფოსთან, სტრატეგიული პარტნიორობის გაგრძელება და განვითარებაა. პოლიტიკურ-ეკონომიკური და სავაჭრო ურთიერთობების გაღრმავებასთან ერთად, პრიორიტეტული იქნება ასევე კულტურული ურთიერთობების განვითარებაც.
ბაქოში ვიზიტის ფარგლებში, საქართველოს პრეზიდენტი შეხვედრებს ასევე გამართავს აზერბაიჯანის პირველ ვიცე-პრეზიდენტთან, პრემიერთან და პარლამენტის თავმჯდომარესთან.
ასევე დაგეგმილია საქართველოს პრეზიდენტის შეხვედრები ქართველ სტუდენტებთნ, წარმატებული ბიზნესსექტორის წარმომადგენლებთან და დიასპორასთან.