„ზვიად კვაჭანტირაძის გამოცდილება და შესაძლებლობები ძალიან საჭირო იქნება ბრძოლისთვის, რომელიც სამართლიანობის იდეის ქვეშ ერთიანდება“, – ამის შესახებ დეპუტატმა ეკა ბესელიამ უმრავლესობიდან ზვიად კვაჭანტირაძის წასვლის საკითხზე კომენტირებისას აღნიშნა.
„ზვიად კვაჭანტირაძე ჩემი მეგობარი და თანამოაზრეა, ჩამოვა საქართველოში და განცხადებას თავად გააკეთებს. ჩვენ მის წასვლამდე საუბარი გვქონდა და შემიძლია გითხრათ, რომ ამ პოლიტიკურ პროცესში ჩვენთან ერთად იქნება, როგორც გამოცდილი, გამორჩეული თანამებრძოლი და ძალიან კარგი დიპლომატი. მისი გამოცდილება და შესაძლებლობები ნამდვილად ძალიან საჭირო იქნება ბრძოლისთვის, რომელიც სამართლიანობის იდეის ქვეშ ერთიანდება. კონსულტაციები გრძელდება ყველასთან, ვინც ამ იდეის თანამოაზრეა. ახლა სახელებისა და გვარების დასახელებას ვერიდები. რაც შეეხება იდეას და შინაარსს, რამაც უნდა გააერთიანოს თანამოაზრეები, ეს არის სამართლიანობა და გამართული მართლმსაჯულება, რომელიც ყველაფრის გარანტიაა, რათა ქვეყანა ძალიან მყარ დემოკრატიულ რელსებზე იყოს“, – განაცხადა ეკა ბესელიამ.
კითხვაზე, უმრავლესობაში აცხადებენ, რომ ირაკლი კობახიძის იმპიჩმენტის საფუძველი არ არსებობს, ეკა ბესელიამ აღნიშნა:
„ვისაც არასერიოზულად მიაჩნია, ერთ მშვენიერ დღეს არ აღმოაჩინოს, რომ ეს უფრო სერიოზულია, ვიდრე ჰგონიათ. ირაკლი კობახიძის იმპიჩმენტის პროცესი არ დამიწყია, თუ დავიწყებ, ბოლომდეც მივიყვან, რადგან რასაც ვიწყებ, ბოლომდე მიმყავს, ამიტომ ნუ წამაქეზებენ. ვიცი, როდის რა ნაბიჯი გადავდგა. ვინც მიცნობს, ყველამ იცის, რომ შუა გზაზე არასდროს ვჩერდები და ფინალშიც ისე გავდივარ, რომ შედეგი დგება. წინ არის ახლა რამდენიმე მნიშვნელოვანი კენჭისყრა, რომელიც ეხება კანონპროექტებს, როგორ მოხდება უზენაესი სასამართლოს მოსამართლეების არჩევა“, – აღნიშნა ეკა ბესელიამ.