საქართველოს უზენაესი სასამართლოს ყოფილი თავმჯდომარე, ნინო გვენეტაძე გაუჩინარებულია.
“2020NEWS”-ის დაჟინებული მცდელობის მიუხედავად, გვენეტაძე მედიასთან და საზოგადოებასთან კონტაქტს ერიდება. “ის აუცილებლად ისაუბრებს ყველაფერზე, მათ შორის იმ ზეწოლაზე, რომელიც მის მიმართ ხდებოდა, მაგრამ ახლა არა. ქალბატონმა ნინომ გადადგომის დღეს თქვა კიდეც, რომ იგი ზეწოლის ქვეშ იმყოფებოდა. დეტალების შესახებ კი, მოვა დრო და აუცილებლად ისაუბრებს”, – განუცხადა “2020NEWS”- ს ნინო გვენეტაძესთან დაახლოებულმა პირმა.
როგორც ცნობილია, დღეს ნინო გვენეტაძის ყოფილი თანაშემწე ალაპარაკდა. მან პარლამენტში, იურიდიულ საქმეთა კომიტეტის სხდომაზე ხმაურიანი განცხადება გააკეთა. კახა წიქარიშვილის თქმით, ნინო გვენეტაძეს ცემითაც ემუქრებოდნენ მოსამართლეთა კლანის წევრები.
“ნინო გვენეტაძე იუსტიციის უმაღლეს საბჭოს წევრებთან გარკვეულ დაპირისპირებაზე უზენაესი სასამართლო თავმჯდომარის მოვალეობის შესრულების დროსაც საუბრობდა”, – ამის შესახებ “2020NEWS”-ს უზენაესი სასამართლოს პრეს-სამსახურის უფროსმა ხათუნა ჩარკვიანმა განუცხადა.
ჩარკვიანის განცხადებით, იგი არ ფლობს კონკრეტულ ინფორმაციას, ემუქრებოდნენ თუ არა გვენეტაძეს ფიზიკური ანგარიშსწორებით. “ფიზიკურ ანგარიშსწორებასთან დაკავშირებით ჩემთვის არანაირი მსგავსი ფაქტი ცნობილი არ არის. ზოგადად, თავად ნინო გვენეტაძემ ღია სხდომებზე, რომელიც იუსტიციის უმაღლეს საბჭოში იმართებოდა ხოლმე, რამდენჯერმე განაცხადა, რომ სხვადასხვა საკითხთან მიმართებაში საბჭოში წევრებთან დაპირისპირება ჰქონდა. ამის ჩანაწერებიც არსებობს. მაშინ, როდესაც ნინო გვენეტაძემ უზენაესი სასამართლოს თავმჯდომარის პოსტი დატოვა და 2 აგვისტოს განცხადება გაავრცელა, ყველა იმ დეტალებზე და ნიუანსებზე გააკეთა აქცენტი, რის გამოც ტოვებდა აღნიშნულ თანამდებობას,“- განაცხადა ჩარკვიანმა.
ცნობისთვის უზენაესი სასამართლოს ყოფილი თავმჯდომარის ყოფილმა თანაშემწემ კახა წიქარიშვილმა დღეს არაერთი სკანდალური განცხადება გააკეთა. პარლამენტში, იურიდიულ საქმეთა კომიტეტის სხდომაზე სიტყვით გამოსვლისას, მან ნინო გვენეტაძის თანამდებობიდან წასვლის შესახებ ისაუბრა: “ვინმემ მკითხეთ ნინო გვენეტაძე სად არის, ან რა რეაგირებას აკეთებს?! არის გამქრალი, იმალება ხალხისგან და საზოგადოებისგან. ის რეალურად მარტო აღმოჩნდა და ვინაიდან მარტო აღმოჩნდა, შეეშინდა. შეეშინდა იმის, რომ მოსამართლეთა კლანის წევრები საბჭოს სხდომაზე სცემდნენ. წარმოიდგინეთ, მისი პიროვნება რა დონის სტრესის ქვეშ ჩავარდა, რომ კლანთან თანამშრომლობის პოლიტიკა აირჩია და არა ბრძოლის. თანამშრომლობის პოლიტიკამ კი გამოიწვია ის, რომ ის ერთ დღეს კლანს დაეთანხმა, მეორე დღესაც, მესამე დღესაც და როდესაც მივიდა პიკამდე, რომ კლანის მსახური უნდა გამხდარიყო, გადადგა“, – განაცხადა წიქარიშვილმა.
შეგახსენებთ, უზენაესი სასამართლოს თავმჯდომარემ ნინო გვენეტაძემ დაკავებული თანამდებობა 2018 წლის 2 აგვისტოს დატოვა. წასვლის მიზეზად კი ჯანმრთელობის მდგომარეობა დაასახელა.