„ვენეციის კომისიის წარმომადგენლებთან ჩვენ გვექნება ისეთივე მჭიდრო თანამშრომლობა, როგორც ეს, წინა შემთხვევაში, ძალიან წარმატებულად გახორციელდა”, – ამის შესახებ ჟურნალისტებს ფრაქცია „ქართული ოცნების” ლიდერმა, მამუკა მდინარაძემ საერთო სასამართლოების შესახებ კანონპროექტთან დაკავშირებით, ვენეციის კომისიის რეკომენდაციების კომენტირებისას განაცხადა.
„ცოტა რთულია იმის თქმა, რომ აბსოლუტურად ყველა რეკომენდაცია იქნება გათვალისწინებული, რადგან ეს პრაქტიკაში ასე არ ხდება. ბუნებრივია, ჩვენ ვაპირებთ, სამართლებრივი ლოგიკისა და კონსტიტუციის შესაბამისი რეკომენდაციები გავითვალისწინოთ. კონსტიტუციაზე მუშაობისას იყო შემთხვევა, როდესაც ჩვენ ძალიან მცირე, მაგრამ რეკომედაციების ნაწილი არ გავითვალიწინეთ. მაგალითად, როდესაც საუბარი იყო პარლამენტის გამორიცხვაზე უზენაესი სასამართლოს მოსამართლეების შერჩევის პროცესში. დღეს უკვე ნათელია, რომ სწორი გადაწყვეტილება მივიღეთ. მთელი ეს დისკუსია ჯანსაღი პროცესია. ჩვენ დიდ ნაწილს გავითვალისწინებთ – ყველაზე რაციონალურ, სამართლებრივად დასაბუთებულ და კონსტიტუციის შესაბამის რეკომენდაციებს“,- აცხადებს მდინარაძე.
მამუკა მდინარაძის ვარაუდით, ვენეციის კომისიის მხრიდან კრიტიკული დასკვნა არ იქნება.
„არ მგონია, დასკვნა კრიტიკული იყოს გამომდინარე იქედან, რომ ჩვენ მიერ შექმნილი დოკუმენტი სრულ შესაბამისობაშია კონსტიტუციასთან, განსხვავებით სხვა მსგავსი დოკუმენტებისგან. მასში არის სამართლებრივი ლოგიკა, თუმცა, დაველოდოთ. ჩვენ გვექნება კონსულტაციები ამასთან დაკავშირებით. იქნება შეხვედრები არამხოლოდ მმართველი გუნდის წარმომადგენლებთან, რათა მაღალი ჩართულობით, ყველა ნიუანსის გათვალისწინებით, მჭიდრო თანამშრომლობის ფარგლებში, მაქსიმალურად რეალური, სამართლებრივი და კონსიტუციის შესაბამისი რეკომენდაციები იქნას გაწერილი”, – განაცხადა მამუკა მდინარაძემ.
“სამართლებრივი ლოგიკისა და კონსტიტუციის შესაბამის რეკომენდაციებს გავითვალისწინებთ”
2019/03/27 20:13:00
კომენტარები
ნანახია: 517 ჯერ