როგორც უღირსი საქციელია კადრების გავრცელება და მორალური შანტაჟის განხორციელება, ასევე უღირსი საქციელია, სხვას დააბრალო ყველაფერი – ასე აფასებენ მმართველ გუნდში დღეს ეკა ბესელიას განცხადებას.
საუბარია, უმრავლესობის ყოფილი დეპუტატის მიერ გამოქვეყნებულ განცხადებაზე, სადაც ბესელია ყოფილ თანაგუნდელებს “კოლექტიურ ტერორისტებად” მოიხსენიებს.
იურიდიული კომიტეტის თავმჯდომარის მოადგილე, დავით მათიკაშვილი მოუწოდებს სამართალდამცველ ორგანოებს დროულად გამოიძიონ დეპუტატის დასაშანტაჟებლად მისი პირადი ცხოვრების ამსახველი კადრების გავრცელების საქმე. მათიკაშვილი ამბობს, რომ ეკა ბესელიას ბრალდებებზე დამატებით კომენტარს არ გააკეთებს.
„როგორც გავრცელება-ატვირთვა დანაშაულთან ერთად არის უზნეო და უღირსი საქციელი, ასევე უზნეო და უღირსი საქციელია ამის დაბრალება ვინმესთვის და რაღაცის გამოგონება,“- აცხადებს დავით მათიკაშვილი.