თბილისის მერმა, კახა კალაძემ “ფეისბუქის” პირად გვერდზე პირდაპირ ეთერში საზოგადოებრივ ტრანსპორტთან დაკავშირებით ისაუბრა.
“დღევანდელი ჩვენი ჩართვა ემსახურება ერთ კონკრეტულ და მნიშვნელოვან საკითხს, რომელიც ეხება საზოგადოებრივ ტრანსპორტს. აქვე გეტყვით, რომ ამ კუთხით ჩვენ დავიწყეთ კონკრეტული პროექტების განხორციელება, კერძოდ ახალი ავტობუსების შესყიდვა და ჩანაცვლება იმ ყვითელი ავტობუსებისა, რომლებიც ჰაერის დაბინძურების კუთხით ქალაქისთვის პრობლემას წარმოადგენენ. ზოგადად ძველ ავტომობილებს დიდი ადგილი უკავიათ ჩვენს ქალაქში, ეს უნდა მოგვარდეს და ჩვენ ამ მიმართულებით კონკრეტულ ნაბიჯებს ვდგავთ. ასევე მინდა გითხრათ რომ 90 ერთეული ავტობუსი უკვე შეძენილია, აქედან 50 უკვე თბილისშია. ჩვენ ახალ ავტობუსებს საზოგადოებას ძალიან მალე წარვუდგენთ. 90 ერთეულის ჩამოსვლა ბოლოს იგეგმება.
შეგახსენებთ ჩვენ გამოცხადებული გვქონდა 8 მეტრიან ავტობუსებზე შესყიდვა და ამასთან გვყავს გამარჯვებული კომპანია, რომელმაც წლის ბოლოსთვის უნდა მოგვაწოდოს 220 ერთეული ავტობუსი. ასევე ჩვენ წინა ჯერზე გავიზიარეთ თბილისელების მოსაზრება ფერთან დაკავშირებით და ამ შემთხვევაშიც იგივეს ვაპირებთ. ჩვენ აუცილებლად გავითვალისწინებთ თქვენს მოსაზრებას ამ თემასთან დაკავშირებით” – განაცხადა კახა კალაძემ “ფეისბუქ” ჩართვისას.