ქვეყნის დალაგება ჩვენი საკითხი არ არის – ამის შესახებ მეუფე ანტონმა ტელეკომპანია “პირველის” ეთერში განაცხადა. მისი თქმით, დავით გარეჯის პრობლემა აქამდე არ უნდა მისულიყო.
„აქამდე არ უნდა მისულიყო საქმე. როგორც ჩანს, მთავრობას რაღაც გამოეპარა. ბევრი პრობლემებია – აგერ რუსეთი, აგერ… სასულიერო პირი ვარ და ვერ განვსჯი სასულიერო უწყებებს. ქვეყნის დალაგება ჩვენი საკითხი არ არის. თუმცა, ეს არ ნიშნავს, რომ ჩვენ არ გვტკივა. ჩვენ ისეთივე მოქალაქეები ვართ ამ ქვეყნისა, როგორც თითოეული თქვენგანი. ჩვენ, რომ სასულიერო პირები ვართ, ეს არ ნიშნავს, რომ ჩვენ არ გვეხება სამოქალაქო საკითხები. სასულიერო პირამდე ჩვეულებრივი მოქალაქე ვარ”, – განაცხადა მეუფემ.
შეგახსენებთ, რომ დავით გარეჯის კომპლექსის სადავო ნაწილს ამ დრომდე ისევ მეზობელი ქვეყნის სამხედროები აკონტროლებენ. დავით გარეჯის სამონასტრო კომპლექსში შემავალ აღდგომის ტაძრის მიმდებარე ტერიტორიაზე არსებულ კელიებში ტურისტებს და დამთვალიერებლებს 4 დღის განმავლობაში აღარ უშვებდნენ. მაშინ, დავით გარეჯის მონასტერში მოღვაწე არქიმადრიტმა კირიონმა და ოპოზიციური პარტიების ნაწილმა ეს ფაქტი გარეჯში სალომე ზურაბიშვილის ვიზიტს დაუკავშირა. საქართველოს პრეზიდენტი სალომე ზურაბიშვილი დავით გარეჯის სამონასტრო კომპლექსში 20 აპრილს იმყოფებოდა.