„ნებისმიერი ჩვენი სტუმრისთვის, პირველივე შეხედვით თვალსაჩინო და ნათელია ქართული კულტურის იდენტობა ევროპულ კულტურასთან,“- ამის შესახებ პრემიერ-მინისტრმა საერთაშორისო ფორუმზე განაცხადა.
მამუკა ბახტაძის თქმით, სრულიად განსაკუთრებულია საქართველოს გეოგრაფია, რადგან ევროპისა და აზიის შესართავზე საქართველო საუკუნეების განმავლობაში ერთგვარი ხიდის როლს თამაშობდა.
„საქართველო ამაყობს თავისი კულტურით, ძველი ტრადიციებით. საქართველო გახლავთ ზუსტად ის ქვეყანა, სადაც ნებისმიერ ადამიანს შეუძლია, ბოლომდე შეიგრძნოს მისი ისტორიის ხანგრძლივობა, მნიშვნელობა და უნიკალური კულტურა. ჩვენი ქვეყანა ათასწლეულების სიღრმიდან მომდინარეობს და სწორედ ეს განაპირობებს მის განსაკუთრებულობას. ქართულ კულტურას საუკუნეების განმავლობაში აყალიბებდა მრავალფეროვანი ისტორია, რამაც უზრუნველყო ძლიერი ეროვნული თვითმყოფადობა და ხელი შეუწყო საქართველოში კულტურის განსაკუთრებულობის აღქმას. სრულიად განსაკუთრებულია ჩვენი გეოგრაფიაც. ევროპისა და აზიის შესართავზე საქართველო საუკუნეების განმავლობაში თამაშობდა ერთგვარი ხიდის როლს. ნებისმიერი ჩვენი სტუმრისთვის პირველივე შეხედვით თვალსაჩინო და ნათელია ქართული კულტურის იდენტობა ევროპულ კულტურასთან, რადგან ჩვენ საერთო საყრდენი, საერთო კულტურული ფასეულობები და ღირებულებათა სისტემა გვაერთიანებს.
ყოველთვის აღვნიშნავ, რომ ქართველი ერის არჩევანი, გახდეს ევროპული ოჯახის სრულუფლებიანი წევრი, არ გახლავთ მხოლოდ პოლიტიკური არჩევანი. ეს არის ცივილიზაციური არჩევანი ამ მიზეზის გამო. დარწმუნებული ვარ, ამ ფორუმით დაიწყება დიალოგების სერია, რომელიც შეკრებს სხვადასხვა ევროპულ კულტურასა და ევროპულ კულტურათა ამ მრავალფეროვნებაში წარმოადგენს ქართული ევროპული კულტურის როლს. მე დავავალე განათლების, კულტურისა და მეცნიერების სამინისტროს, რომ დაგვეწყო ამ მიმართულებით აქტიური ნაბიჯების გადადგმა და ბუნებრივია, ეს ფორუმი გახდება ტრადიციული. ეს კამპანია იქნება ტრადიციული. ჩვენ ევროპული კულტურული სივრცის განუყოფელი ნაწილი ვართ და ბუნებრივია, ამის შესახებ მეტი საუბარია საჭირო. დარწმუნებული ვარ, ეს ფორუმის ჩამოყალიბებაში ძალიან მნიშვნელოვან როლს შეასრულებს“, – განაცხადა მამუკა ბახტაძემ.