“მარტო სკოლების აღდგენა-რესტავრაცია და კომპიუტერიზაციაში აქვს დახარჯული ”ქართუ ფონდს“ 100 მილიონამდე ლარი”

“გარკვეული მიზეზების გამო, ჩემთვის მძიმე საყურებელი იყო გასულ შაბათს ჩატარებული „აქცია პერფორმანსი“, როდესაც ახალგაზრდების ჯგუფი ბიძინა ივანიშვილისაგან ითხოვდა ხის შესყიდვას, რათა სტატუსშეჩერებული სტუდენტები დააფინანსონ”, – ამის შესახებ საპარლამენტო უმრავლესობის დეპუტატი, გია ვოლსკი სოციალურ ქსელში წერს.
ვოლსკი მიიჩნევს, რომ “სამართლიანობის მაძიებელმა” ახალგაზრდამ ასე არ უნდა ილაპარაკოს.
“ყოველგვარი პოლიტიკური კუთვნილების გარეშე:
ქუჩის აქციები არც საქართველოსთვისაა უცხო და არც – მსოფლიოს ნებისმიერი ქვეყნისათვის. ეს ცალკე თემაა. გარკვეული მიზეზების გამო, ჩემთვის მძიმე საყურებელი იყო გასულ შაბათს ჩატარებული „აქცია პერფორმანსი“, როდესაც ახალგაზრდების ჯგუფი ბიძინა ივანიშვილისაგან ითხოვდა ხის შესყიდვას, რათა სტატუსშეჩერებული სტუდენტები დააფინანსონ.
აქციის მცირე მასშტაბს ამ შემთხვევაში არა აქვს მნიშვნელობა, არც იმას, რომ სოციალური ფონი ჩვენი თანამედროვე პოლიტიკური აქტივობების სამწუხარო მახასიათებელია. კონკრეტულ შემთხვევაში მნიშვნელობა აქვს იმას, რომ აქციას „განათლების დიდი მოამაგე“ სააკაშვილი ატარებს და, ამჯერად, გიორგი სიგუას „კრეატიული ნიჭის“ წყალობით ცდილობს თავის შეხსენებას.
იყიდოს, წაიღოს. ჩაეხუტოს, რაც უნდა, ის უქნას…, ვფიქრობ, სამართლიანობის მაძიებელმა ახალგაზრდამ ასე არ უნდა ილაპარაკოს. მათ გასაგონად ვამბობ, თორემ სიგუას აღარაფერი ეშველება. არც ის ადამიანები დარჩენილან გაწბილებულები, ვისგანაც აქამდე ხეები იქნა შესყიდული და არც ქვეყანა, სადაც ბიძინა ივანიშვილმა არაერთი უნიკალური ბაღი გააშენა, ეს გრძელი სიაა. ბევრჯერ ითქვა, კიდევ ვიტყვი ახალგაზრდების გასაგონად: არაერთი ასეთი სია შეიძლება, გაკეთდეს ქველმოქმედების, ისტორიული ძეგლების, კულტურის ცენტრების აღდგენის, შენების, დასაქმების მიმართულებებით.
მარტო სკოლების აღდგენა-რესტავრაცია და კომპიუტერიზაციაში აქვს დახარჯული ”ქართუ ფონდს“ 100 მილიონამდე ლარი. მისი დაფინანსებით სწავლობს ათეულობით სტუდენტი აშშ – ში, ევროპაში.
კონსერვატორია, სამხატვრო აკადემია, თბილისის სახელმწიფო უნივერსიტეტი, ეროვნული ბიბლიოთეკა, ბოტანიკის ინსტიტუტი, არაერთი მუზეუმი და საგანმანათლებლო ცენტრი – ეს უკვე შემდგარი პროექტებია. თბილისისა და ქუთაისის ტექნოლოგიური ინსტიტუტებიც სულ მალე მოემსახურებიან ჩვენი ახალგაზრდების (და – არამარტო) განათლებასა და ქვეყნის განვითარების საქმეს.
ერთი მომწეროს ვინმემ – რა დააშავა?!
დარწმუნებული ვარ, განათლების სამინისტროსაც ბევრი აქვს სათქმელი, ზოგადად, სტუდენტებისა და, მათ შორის, შეჭირვებული ოჯახებიდან გამოსულთა დახმარების, საზღვარგარეთ სწავლების, ტექნიკური განათლების სისტემის გაფართოების, ცოდნის ხარისხის ამაღლების პროექტებზე… პრობლემებზეც”, -წერს ვოლსკი.