“გულწრფელად მჯერა, რომ საკითხის მნიშვნელობიდან გამომდინარე უმოკლეს ვადაში ყველა კითხვას უნდა გაეცეს პასუხი“

“გულწრფელად მჯერა, რომ საკითხის მნიშვნელობიდან გამომდინარე უმოკლეს ვადაში ყველა კითხვას უნდა გაეცეს პასუხი“, – ამის შესახებ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, დავით სერგეენკომ მალხაზ მაჩალიკაშვილის საკითხზე საუბრისას განაცხადა.
„ეს თემა ძალიან რეზონანსული და ერთგვარად მტკივნეულია. ძალიან მგრძნობიარე თემა არის, ამიტომ ჩემი მოსაზრება ასეთია, რომ არ უნდა დარჩეს არცერთი პასუხგაუცემელი კითხვა და ეს უნდა მოხდეს მაქსიმალურად მოკლე ვადაში. მე ვერ ჩავერევი საკუთრივ საგამოძიებო პროცესებში, არ ვარ იურისტი და გამიჭირდება მსჯელობა. ჯერ უნდა გავრცელებულიყო ინფორმაცია და მერე ყოფილიყო მიღებული ზომები, თუ პირიქით. მე გულწრფელად მჯერა, რომ საკითხის მნიშვნელობიდან გამომდინარე უმოკლეს ვადაში ყველა კითხვას უნდა გაეცეს პასუხი“, – განაცხადა დავით სერგეენკომ.
სუს-ის ინფორმაციით, გამოვლინდა მალხაზ მაჩალიკაშვილის განზრახვა ტერაქტის ორგანიზების გზით სოსო გოგაშვილისა და მისი ოჯახის წევრების მკვლელობის თაობაზე. ამასთან, სუს-მა მალხაზ მაჩალიკაშვილისა და მისი ძმისშვილის საუბრის აუდიოჩანაწერი გაავრცელა, რომელშიც, უწყების მტკიცებით, მალხაზ მაჩალიკაშვილი ძმისშვილთან ტერაქტის მომზადებაზე საუბრობს. სუს-ის ინფორმაციით, მალხაზ მაჩალიკაშვილისა და მისი ძმისშვილის საუბარი სატელეფონო ჩანაწერი არ არის.