სანდრა რულოვსს არჩევნების შედეგებთან შეგუება მოუწევს. შეიძლება ითქვას, რომ „ნაციონალური მოძრაობა“ დაშლილია. განცხადება ჟურნალისტებთან თბილისის მერმა კახა კალაძემ გააკეთა.
„ქართული ოცნება – დემოკრატიული საქართველოს“ გენერალურმა მდივანმა თქვა, რომ ერთადერთი რაზეც პოლიტიკური გაერთიანება დგას ტელეკომპანია „რუსთავი 2“ და ნიკა გვარამიაა.
„მე გამიჭირდება დაპირისპირებაზე რაიმე კომენტარი გავაკეთო. შეიძლება ითქვას, რომ „ნაციონალური მოძრაობა“ დაშლილია. ერთადერთი რაზეც დგას დღეს „ნაციონალური მოძრაობა“, ეს არის ტელეკომპანია „რუსთავი 2“ და ნიკა გვარამია“, – განაცხადა კახა კალაძემ.
თბილისის მერი გაერთიანებული ოპოზიციის“ წარმომადგენლის – ნიკა მელიასა და სანდრა რულოვსის მიერ ურთიერთსაწინააღმდეგო რევოლუციური სცენარის შესახებ გაკეთებულ განცხადებებსაც გამოეხმაურა და თქვა, რომ პარტიაში დაპირისპირებაა.
19 მაისს ნიკა მელიამ განაცხადა, რომ არავის აქვს ერთპიროვნული განცხადებების გაკეთების უფლება. მისი თქმით, არავის აქვს უფლება რევოლუცია დააანონსოს და შემდეგ არ დაიწყოს.