ჭიათურის შემთხვევამ აჩვენა, რომ შრომითი საკითხების სერიოზული გაუმჯობესების შესაძლებლობა არსებობს, – ამის შესახებ პარლამენტის თავმჯდომარე ირაკლი კობახიძემ განაცხადა.
პარლამენტის სპიკერი მოხარულია, რომ მოლაპარაკებები წარმატებით დასრულდა.
„მოხარული ვარ, რომ ამ შემთხვევაში, წარმატებით დასრულდა მოლაპარაკებები და მაღაროელების სამართლიანი მოთხოვნები დაკმაყოფილდა, რაც ძალიან კარგი პრეცედენტია, რაც აჩვენებს იმას, რომ ზოგადად, ჩვენ დადებითი ტენდენცია გვაქვს იმ კუთხით, რომ უფრო მეტად ხდება მშრომელების ინტერესებისა და მათი სამართლიანი მოთხოვნების გათვალისწინება“, – განაცხადა ირაკლი კობახიძემ.
მისი შეფასებით, ამას მყარი საფუძველი კანონმდებლობამ უნდა შეუქმნას.
„არის საუბარი არაერთ ცვლილებაზე, რომელიც შესაძლოა, შრომის კოდექსში განხორციელდეს, მათ შორის ანაზღაურების, შვებულებების კუთხით და ა.შ. საზედამხედველო ფუნქციის განვითარება არის ასევე ერთ-ერთი მნიშვნელოვანი პრიორიტეტი და ამ კუთხით ჩვენ საერთაშორისო დონორების თანადგომასა და მხარდაჭერას ველოდებით“, – განაცხადა საქართველოს პარლამენტის თავმჯდომარემ.