შინაგან საქმეთა სამინისტროს ჰარვარდის პოლიციის უფროსი ეწვია

შინაგან საქმეთა სამინისტროს ჰარვარდის პოლიციის უფროსი – ედუარდ დენმარკი ეწვია. ვიზიტის ფარგლებში, ამერიკელმა ექსპერტმა მართლწესრიგის ოფიცრებთან სამუშაო შეხვედრა გამართა.
შინაგან საქმეთა სამინისტროს აკადემიაში ჰარვარდის პოლიციის უფროსმა საზოგადოებაზე ორიენტირებული საპოლიციო მოდელის მნიშვნელობასა და უსაფრთხო გარემოს შექმნაში მართლწესრიგის ოფიცრების როლზე ისაუბრა. მან მართლწესრიგის ოფიცრების საქმიანობა დადებითად შეაფასა.
ედუარდ დენმარკის ვიზიტი შინაგან საქმეთა სამინისტროსა და საქართველოს სტრატეგიისა და განვითარების ცენტრის (GCSD) პროექტის – „საზოგადოებასა და პოლიციას შორის ნდობის გამყარება“ ფარგლებში განხორციელდა.
შეხვედრას თბილისის 162-ე საჯარო სკოლის მოსწავლეებიც ესწრებოდნენ. მართლწესრიგის ოფიცრები ახალგაზრდებს საზოგადოების უსაფრთხოების და დანაშაულის პრევენციის შესახებ ესაუბრნენ. მათ მოსწავლეებს საკუთარი ფუნქცია-მოვალეობები გააცნეს და სამართალდამცველთა საქმიანობის შესახებ ახალგაზრდების მიერ დასმულ შეკითხვებს უპასუხეს.
შეხვედრის დასასრულს, მართლწესრიგის ოფიცრებსა და სკოლის მოსწავლეებს შორის გუნდური თამაშები გაიმართა.