საქართველოს პარლამენტის იურიდიულ საკითხთა კომიტეტის თავმჯდომარე, ანრი ოხანაშვილი მიიჩნევს, რომ საქართველოს თავდაცვის ყოფილ მინისტრს, დავით კეზერაშვილსა და “ნაციონალურ მოძრაობას” კონკრეტული ჯგუფისთვის მომსახურე მორიგი მედიის შექმნა სურთ. მისივე განცხადებით, მმართველი გუნდის დამსახურებაა, რომ ქვეყანაში დაცულია მედიაპლურალიზმი, სიტყვისა და გამოხატვის თავისუფლება და გამარტივებულია მედიის დაფუძნების შესაძლებლობაც.
„ჩვენი ხელისუფლების მონაპოვარია, რომ ქვეყანაში უზრუნველვყოთ მედია პლურალიზმი, არსებობდეს კრიტიკული და ობიექტური მედია. ვინც გადაწყვეტს, რომ მედია დააფუძნოს, სამართლებრივი საფუძვლები ისეა ჩამოყალიბებული, რომ ამის პრობლემები არავის ექმნება. როგორც ჩანს, დავით კეზერაშვილსა და „ნაციონალური მოძრაობის“ მის გარშემო მყოფ წარმომადგენლებს ინტერესი აქვთ, რომ მათ კონკრეტული ჯგუფისთვის მომსახურე მორიგი მედია, ტელევიზია შექმნან. შესაძლებელია, ეს ინტერესი ჰქონდეთ იქედან გამომდინარე, რომ წარსული გამოცდილება გვიჩვენებს კეზერაშვილისა და სხვების კავშირს კონკრეტულ მედიასაშუალებებთან. ეს შეიძლება, მორიგი ასეთი მცდელობა იყოს“, – განაცხადა ოხანაშვილმა.
შეგახსენებთ, საქართველოს თავდაცვის ყოფილმა მინისტრმა, დავით კეზერაშვილმა „ფეისბუქის“ გვერდზე დაწერა, რომ მიიღო გადაწყვეტილება, მეგობრებთან ერთად დააფუძნოს ახალი სატელევიზიო პლატფორმა, რომელიც უზრუნველყოფს ქართველი ხალხის დასავლური არჩევანის დაცვას.
როგორც დავით კეზერაშვილი აღნიშნავს, ახალი სატელევიზიო პლატფორმა დაიცავს თავისუფალი და მიუკერძოებელი ჟურნალისტიკის უმაღლეს სტანდარტებს.
“კეზერაშვილსა და „ნაცმოძრაობის“ წევრებს ინტერესი აქვთ, რომ მათ კონკრეტული ჯგუფისთვის მომსახურე მორიგი მედია შექმნან”
2019/08/01 17:32:34
კომენტარები
ნანახია: 455 ჯერ