ტელეკომპანია “რუსთავი 2” – ის ყოფილი გენერალური დირექტორის ნიკა გვარამიას განცხადებით, მის მიერ შექმნილი ახალი არხის სამომავლოდ დაფინანსების სურვილი “იბერია ბიზნესჯგუფის” დამფუძნებელმა ზაზა ოქუაშვილმაც გამოთქვა და ზაზა ოქუშვილი მისი ახალი არხის ერთ-ერთი მთავარი დამფინანსებელი იქნება. ამის შესახებ გვარამიამ გუშინ, რუსთაველის გამზირზე მიმდინარე აქცია-გადაცემაში სტუმრობისას განაცხადა.
გადაცემის წამყვანმა შოთა დიღმელაშვილმა გვარამიას ჰკითხა, თუ როგორ აპირებდა ახალი არხის დაფინანსებას.
“ფული მოდის ბევრი მხრიდან, მე ვმუშაობ “ფანდრაიზინგზე”. სამწუხაროდ, არ მაქვს ფუფუნება, რომ მყავდეს ისეთი დამფინანსებელი, როგორიც მეორე შემთხვევაშია (დავით კეზერაშვილი), წინააღმდეგ შემთხვევაში, ბევრად სწრაფად გავაკეთებდი ამ ყველაფერს. ვმუშაობ ბევრი მიმართულებით. ყველასთან დავილაპარაკებ, მიხეილ სააკაშვილით დაწყებული, ზაზა ოქუაშვილით დამთავრებული. ზაზა ოქუაშვილს ნამდვილად ველაპარაკე და ის აპირებს ამაში მონაწილეობის მიღებას.
ყველა ადამიანს დაველაპარაკები, ვინც ებრძვის დიქტატურას საქართველოში და მივიღებ მათგან ფულს, გავაკეთებ საქვეყნო საქმეს. მე არ მერცხვინება არავისთან ლაპარაკი, მიხეილ სააკაშვილთან, მითუმეტეს. მისი შეცდომები განსახილველია, მაგრამ ვთვლი, სააკაშვილი თანამედროვე საქართველოს დამფუძნებელია და მასთან ლაპარაკი სირცხვილი არ არის”, – თქვა ნიკა გვარამიამ.