არჩილ თალაკვაძე: საქართველო დასავლეთის საიმედო პარტნიორია და ეს მათი მხრიდან სათანადოდაა დაფასებული

“შვედეთი იქნება ერთ-ერთი ჩვენი მეგობარი, რომელიც ცივილიზებულ მსოფლიოს კიდევ უფრო აქტიურად და ხმამაღლა მოუყვება, თუ რას აკეთებს საქართველო და როგორია საქართველოს ძალისხმევა, გახდეს ევროკავშირის წევრი”, – ამის შესახებ საქართველოს პარლამენტის თავმჯდომარემ არჩილ თალაკვაძემ შვედეთის სამეფოს პარლამენტის თავმჯდომარე ანდრეას ნორლენთან შეხვედრის შემდეგ განაცხადა. როგორც მან აღნიშნა, საქართველო დასავლეთის საიმედო პარტნიორია და ეს მათი მხრიდან სათანადოდაა დაფასებული.
„საქართველოს ევროპული და ევროატლანტიკური ინტეგრაცია არის ჩვენი ხალხის ისტორიული და მტკიცე არჩევანი. რა თქმა უნდა, ჩვენი ხელისუფლების კურსი არის ძალიან სწორად და კარგად განსაზღვრული ამ მიმართულებით. საქართველოს აქვს კარგი პროგრესი ევროინტეგრაციის დღის წესრიგში. ჩვენ პასუხისმგებლობით ვასრულებთ იმ ამოცანებსა და სამოქმედო გეგმებს, რომლებიც ამ თანამშრომლობის ფარგლებში გვაქვს დასახული.
​ვფიქრობთ, რეგიონში საქართველო არის დასავლეთის საიმედო პარტნიორი და ეს ჩვენი პარტნიორების მხრიდანაც არის სათანადოდ დაფასებული. ჩვენ ერთად ვქმნით მომენტს, როდესაც საქართველო გახდება ევროკავშირისა და ნატო-ს სრულუფლებიანი წევრი. რა თქმა უნდა, რეფორმები, რომლებსაც ვატარებთ, საზოგადოების მხარდაჭერა ამ კურსის მიმართ, იქნება გადამწყვეტი ამ ამბიციური მიზნების შესრულებაში“, – განაცხადა არჩილ თალაკვაძემ.