საქართველოს პრეზიდენტის სალომე ზურაბიშვილის განცხადებით, ის მზად არის ყველა პოლიტიკურ მხარეს და საზოგადოებას ნეიტრალური პოლიტიკურ პლატფორმა შესთავაზოს “რათა განსხვავებების მიუხედავად, ერთად გადავჭრათ არსებითი საკითხები”, – ამის შესახებ პრეზიდენტმა მაკკეინის ინსტიტუტისა და ეკონომიკური პოლიტიკის კვლევის ცენტრის ორგანიზებული საერთაშორისო კონფერენციის მონაწილეებთან შეხვედრაზე, სიტყვით გამოსვლისას განაცხადა.
“საჭიროების შემთხვევაში, ასევე მზად ვარ, ამ საკითხებში ჩავრთო უცხოელი პარტნიორები და თქვენ. თქვენ შეგიძლიათ იყოთ მიუკერძოებლობის გარანტი, რომელიც სამწუხაროდ, კვლავ გვჭირდება ერთმანეთის ნდობისთვის. ჩვენ გვაქვს საშინაო და საგარეო გამოწვევებით აღსავსე გზა და დარწმუნებული ვარ, რომ ამ გზის ბოლოს არის ის საქართველო, რომელზეც ყველა ვოცნებობდით და ვოცნებობთ”, – განაცხადა პრეზიდენტმა და თქვა, რომ მნიშვნელოვანი გამოწვევა ქვეყნის შიგნიდან მოდის, იმიტომ რომ საზოგადოება დაყოფილია:
“ჩვენ არ ვართ ერთადერთი, ვინც საზოგადოების შიდა დაყოფისა და პოლარიზაციის პრობლემების წინაშე დგას. ეს ის საკითხებია, რომლებთან გამკლავებაც გამოცდილ დემოკრატიებსაც კი უჭირთ, ჩვენი დონის დემოკრატიისათვის კი დამანგრეველია. შესაბამისად, ჩვენ უნდა გავამახვილოთ ყურადღება არა იმაზე რაც გვყოფს, არამედ იმაზე, რაც გვაერთიანებს. მშვიდობიანი გზით საქართველოს სუვერენიტეტის აღდგენისა და ევროატლანტიკური ინტეგრაციის მიზნები და ამ მიმართულებით პრაგმატული ნაბიჯების გადადგმა არის ის, რის გარშემოც უნდა გავერთიანდეთ”, – განაცხადა საქართველოს პრეზიდენტმა.
სალომე ზურაბიშვილმა მედიასივრცეზეც ილაპარაკა და თქვა, რომ მედიასივრცე ტრანსფორმაციას განიცდის “და არა შევიწროებას, როგორც ეს ხშირადაა წარმოჩენილი”.
“ძალიან მნიშვნელოვანია, რომ ეს ტრანსფორმაცია და ახალი მაუწყებლების შექმნა იძლევა შესაძლებლობას შევთანხმდეთ ქცევის წესებზე, თვითრეგულირებაზე – სიძულვილის ენისა და ცრუ ინფორმაციის გავრცელების წინააღმდეგ და ვკონცენტრირდეთ საერთო ბრძოლაზე, რადგან, არც ერთი საზოგადოება არ შეიძლება შედიოდეს საარჩევნო პროცესში დეზინფორმირებული, არ შეიძლება საზოგადოებას წაართვა შესაძლებლობა, იყოს ინფორმირებული”, – განაცხადა ზურაბიშვილმა.