პრეზიდენტის საპარლამენტო მდივანი დიმიტრი გაბუნია პროკურატურიდან გამოსვლის შემდეგ აცხადებს, რომ ის მოწმის სახით დაიკითხა სამსახურეობრივი უფლებამოსილების შესაძლო გადამეტებასთან დაკავშირებით და გამოძიებასთან დადო გაუთქმელობის ხელწერილი, ამიტომ დეტალებზე ვერ ისაუბრებს.
“პირველ რიგში აბსოლუტურად ღია ვიქნები კანონმდებლობის ფარგლებში, მედიასთან ვიქნები ღია, მე დავიკითხე მოწმის სახით აღძრულ სისხლის სამართლის საქმესთან დაკავშირებით უფლებამოსილების შესაძლო გადამეტებაზე, მე მოვაწერე ხელი გაუთქმელობის ხელწერილს და არა მაქვს უფლება მოგახსენოთ, რასთან დაკავშირებით დაისვა კითხვები, კანონს ვერ დავარღვევ, მე ვუთხარი ყველაფერი გამოძიებას, ის რაზეც მე ვილაპარაკე რამდენიმე დღის წინ, პირველ რიგში მე ვენდობი სრულად გამოძიებას, რომ ის არის დაინტერესებული გამოავლინოს შესაძლო დანაშაულში მხილებული პირები და 200 %-ით ვენდობი პროკურატურას და გამოძიებას, ჩემს ინტერესებში იყო, რომ დავკითხულიყავი, დარწმუნებული ვარ, რომ გამოძიება დადებს დასკვნას და თუ შესაძლო დანაშაულში მხილებული პირები გამოვლინდნენ, აუცილებლად უნდა დაისაჯონ, აქვე ვაცხადებ, როგორც კი დამთვრდება გამოძიება, ყველა ის პირი, ვინც მე გამრია ამ ცილისწამებაში კანონის სრული პასუხისმგებლობით აგებს პასუხს”, – განაცხადა გაბუნიამ.
მისივე განმარტებით, აუცილებლად შეიტანს სარჩელს ირმა ნადირაშვილის წინააღმდეგ და ასევე ყველა იმ ადამიანის მიმართ, ვინც საჯაროდ ხელი დაადო. მისი განცხადებით, შეწყალების სიასთან საერთოდ არ ჰქონია საქმე.
“ირმა ნადირაშვილის წინააღმდეგ აუცილებლად შევიტან სარჩელს და ყველა იმ ცრუპენტელას მიმართაც, ვინც საჯაროდ ხელი დამადო და მამხილა კორუფციაში… შემხებლობა არ მქონია შეწყალების დეპარტამენტთან, სია არ ვიცი”, – აცხადებს გაბუნია.
შეგახსენებთ, რომ საქართველოს გენერალურმა პროკურატურამ პრეზიდენტ სალომე ზურაბიშვილის მიერ პატიმრების შეწყალების ფაქტზე გამოძიება დაიწყო. საქართველოს პრეზიდენტმა 28 აგვისტოს, მარიამობის დღესასწაულთან დაკავშირებით, 34 მსჯავრდებული შეიწყალა. მათ შორის არიან მკვლელობისთვის გასამართლებული სამი პირი და ერთი ძებნილი.