ტელეკომპანია „ფორმულას“ გენერალური დირექტორი, ზუკა გუმბარიძე პროკურატურაში დაიბარეს. იგი „ინტერმედიას“ საქმეზეა დაბარებული.
ზუკა გუმბარიძე კომპანია „ინტერმედიას“ დამფუძნებელიცაა. გუმბარიძე გენერალურ პროკურატურაში ადვოკატთან ერთად 2 ოქტომბერს, 14 საათზე მივა.
პროკურატურაში საგამოძიებო მოქმედებები მიმდინარეობს რუსთავი 2-ის კონტრაქტორი სარეკლამო კომპანიის, ინტერ მედია პლიუსის მიერ მიღებული დიდი ოდენობით თანხების ხარჯვის კანონიერების შესასწავლად.
პროკურატურის ინფორმაციით, 2015 წლის საანგარიშო პერიოდში რუსთავი 2-ის მიერ მიღებულმა დეკლარირებულმა ზარალმა 7 377 230 ლარი შეადგინა, ამავე პერიოდში ინტერ მედია პლიუსის დეკლარირებულმა მოგებამ კი 8 690 664 ლარი.
ამ კომპანიის კონტექსტში, 9 აგვისტოს გამართულ ბრიფინგზე პროკურორმა ახსენა ზუკა გუმბარიძე, რომელმაც თანამოაზრეებთან ერთად რუსთავი 2-ის ხალვაშისთვის გადაცემის შემდეგ ახალი არხის გახსნა დააანონსა.