საქართველოს საფეხბურთო ნაკრები დღეს ირლანდიას დაუპირისპირდება. „დინამო არენაზე“ ევროპის 2020 წლის ჩემპიონატის საკვალიფიკაციო ეტაპის ფარგლებში შეხვედრა 17:00 საათზე დაიწყება.
საქართველოს ეროვნულმა ნაკრებმა ირლანდიასთან მატჩამდე ზესტაფონის ბაზაზე ივარჯიშა. ეროვნული ნაკრების მთავარმა მწვრთნელმა ვლადიმერ ვაისმა მატჩის წინ გამართულ პრესკონფერენციაზე თქვა, რომ ირლანდია კარგი გუნდია, რომელსაც გამოცდილი მწვრთნელი ჰყავს და ხარისხი მან დღემდე გამართულ შეხვედრებში უკვე აჩვენა.
„რა თქმა უნდა, შეხვედრა ჩვენთვის ძალიან მნიშვნელოვანია. ვფიქრობ, რომ დარჩენილი მატჩები ერთა ლიგის ნახევარფინალური შეხვედრისთვის მოსამზადებელი ეტაპიცაა. იქ წარმატება კი ყველას ოცნებაა.
ირლანდიას ძალიან დაბალანსებული ნაკრები ჰყავს და მათ წინააღმდეგ თამაში ყოველთვის რთულია. მეტოქეს ძლიერი დაცვის ხაზი ჰყავს, რომლის წინააღმდეგ გოლის გატანა იოლი არაა. ირლანდიელი ფეხბურთელები უმაღლეს დონეზე ასპარეზობენ. გუნდს ნამდვილად კარგი ბალანსი აქვს დაცვისა და შეტევის ხაზში.
წარმატების მისაღწევად ისე უნდა ვითამაშოთ, როგორც ეს დანიასთან იყო, მაგრამ შეტევაში უკეთ უნდა ვიმოქმედოთ. პირველი გოლის გატანას შევეცდებით და იმედი მაქვს, რომ ისტორიაში პირველად ირლანდიას დავამარცხებთ“, – განაცხადა ვაისმა.
ევროპის ჩემპიონატის საკვალიფიკაციო ეტაპზე, საქართველოს საფეხბურთო ნაკრები 8 სექტემბერს დანიას დაუპირისპირდა. მატჩი ფრედ დასრულდა.