სირიის დემოკრატიული ძალების ჯაშუშმა შეძლო ტერორისტული ორგანიზაცია „ისლამური სახელმწიფოს“ ლიდერის აბუ ბაქრ ალ-ბაღდადის საცვლების მოპარვა. ამან საშუალება მისცა სპეცსამსახურებს ლიკვიდაციის ოპერაციის წინ დაემტკიცებინათ მისი ვინაობა.
ამის შესახებ სირიის დემოკრატიული ძალების სამხედრო მრჩეველმა პოლატ კანმა „ტვიტერზე“ დაწერა.
„ჩვენმა წყარომ, რომელმაც შეძლო გასულიყო ალ-ბაღდადთან კონტაქტზე, მოიტანა მისი საცვლები, რათა ჩაგვეტარებინა დნმ-ის ანალიზი და დავრწმუნებულიყავით, რომ საუბარი სწორედ ალ-ბაღდადზე იყო“, – წერს სამხედრო მრჩეველი.
მისი თქმით, ალ-ბაღდადის ლიკვიდაციის გადაწყვეტილება ერთი თვის წინ მიიღეს, თუმცა ამერიკელი სამხედროების გასვლამ სირიიდან, ოპერაცია დროებით შეაჩერა.
შეგახსენებთ, რომ 28 ოქტომბერს აშშ-ის პრეზიდენტმა დონალდ ტრამპმა „ისლამური სახელმწიფოს“ ლიდერის აბუ ბაქრ ალ-ბაღდადის გარდაცვალების შესახებ ინფორმაცია დაადასტურა.
ვრცლად ამის შესახებ შეგიძლიათ გაეცნოთ ბმულზე.