ცოტნე გამსახურდიას მკვლელობის მცდელობის საქმეზე, დანაშაულის შეუტყობინებლობის ბრალდებით, დაკავებულია მისი ბავშვობის მეგობარი პეტრე ყუფარაძე,- ამის შესახებ ადვოკატმა, ვაჟა არობელიძემ პოლიციის მთავარ სამმართველოში შესვლამდე განაცხადა.
ის ყუფარაძის ინტერესებს იცავს და მასთან შესახვედრად მივიდა სამმართველოში.
როგორც ადვოკატმა აღნიშნა, აქვს ინფორმაცია, რომ საქმეზე ხუთიდან სამი პირი სარფის საზღვართან დააკავეს. ვაჟა არობელიძის თქმით, მათ შორის არის მძღოლი, რომელსაც მკვლელობის მცდელობისთვის დაკავებული და კიდევ ერთი პირი მოჰყავდა საზღვრისკენ.
ამასთან, ადვოკატის თქმით, ყუფარაძე სასწრაფო დახმარებისა და პოლიციის მისვლისას, ადგილზე იმყოფებოდა და დაჭრილთან ერთად წავიდა სასწრაფო დახმარების მანქანით საავადმყოფოში.
„რაში გამოიხატებოდა დანაშაულის დაფარვა, არ ვიცი“, – განაცხადა ვაჟა არობელიძე.
ცოტნე გამსახურდიას დაჭრის ფაქტზე პოლიციამ ხუთი პირი დააკავა. შსს-ის ინფორმაციით, აქედან ერთი პირი დაკავებულია განზრახ მკვლელობის მცდელობის ბრალდებით, ხოლო ოთხი პირი – განსაკუთრებით მძიმე დანაშაულის შეუტყობინებლობის ბრალდებით.
დაკავებულებს ბრალს ოფიციალურად სავარაუდოდ დღეს წარუდგენენ.
საქართველოს პირველი პრეზიდენტის შვილი ცოტნე გამსახურდია 19 დეკემბერს დაჭრეს. გამსახურდიას ორი ოპერაციაში ჩაუტარდა. მედიკოსების შეფასებით, მისი მდგომარეობა კვლავ მძიმეა.