ერთი წლით თავისუფლების აღკვეთა გურიაში, ლანჩხუთში მცხოვრებ ქალს პირადი ინფორმაციის უკანონოდ მოპოვების და გავრცელებისთვის მიუსაჯეს. გადაწყვეტილება ოზურგეთის რაიონულ სასამართლოში მოსამართლე ბიძინა სტურუამ მიიღო.
ინფორმაციას ამის შესახებ, Batumelebi.netgazeti.ge ავრცელებს.
საქმის მასალების მიხედვით, ქალმა თავისი მულის და მისი მეგობარი კაცის საწოლში გადაღებული ფოტო ჯერ უკანონოდ მოიპოვა, ხოლო შემდეგ „ფეისბუქში“ საკუთარ გვერდზე ატვირთა, „რითაც ნ.-ს და კ.-ს სხვების თვალში მორალური რეპუტაციის შელახვით მიაყენა მნიშვნელოვანი ზიანი,“ – აღნიშნულია განაჩენში.
მოსამართლემ ამ საქმეზე მხოლოდ ბრალდებულის ჩვენება მოისმინა, რომელმაც თავი დამნაშავედ სცნო და თქვა, რომ „ინანიებს ჩადენილ ქმედებას“. მას სადავოდ არ გაუხდია არცერთი მტკიცებულება, რომელიც ამ საქმეზე პროკურორმა სასამართლოში წარმოადგინა. შესაბამისად, მოსამართლეს სხვების პოზიციები, მათ შორის, დაზარალებულების არ მოუსმენია.
იმის გათვალისწინებით, რომ ბრალდებული ნასამართლევი არ ყოფილა და ჩადენილი დანაშაული მოინანია, მოსამართლემ მას სასჯელი პირობით ჩაუთვალა, ხოლო გამოსაცდელ ვადად ორი წელი დაუდგინა.